ଟିଟିଲାଗଡ :(ସଞ୍ଜୟ କୁମାର ନାୟକ) ରାଜସ୍ଥାନର ଇଷ୍ଟ ଦେବୀ ହେଲେ ମା ଗନଗୋର। ମା ଗନଗୋରଙ୍କ ପୂଜା ନିମନ୍ତେ ଟିଟିଲାଗଡ ସହରରେ ଥିବା ରାଜସ୍ଥାନୀ ପରିବାରର ମହିଳା ମାନଙ୍କ ଦ୍ବାରା ଅତି ଧୁମଧାମରେ ଚଳିତ ବର୍ଷ ଏହି ପୂଜା ପାଳନ କରାଯାଇଛି। ହୋଲି ଦହନ ପରେ ତାହାର ପାଉଁଶ ଦ୍ବାରା ଏକ ଦେବୀଙ୍କ ପ୍ରତିମୂର୍ତ୍ତି ନିର୍ମିତ କରାଯାଇ ୧୬ ଦିନ ବ୍ୟାପି ସେହି ପ୍ରତିମୂର୍ତ୍ତିଙ୍କୁ ନିଷ୍ଠାର ସହିତ ପୂଜା କରାଯାଇଥାଏ। ଏହି ପୂଜା ବିବାହିତା ନାରୀ, କୁଆଁରୀ କନ୍ୟା ମାନଙ୍କ ଦ୍ବାରା କରାଯାଇଥାଏ, କଥାରେ ଅଛି ନିଜ ସ୍ୱାମୀର ଉନ୍ନତି ତଥା ଦୀର୍ଘାୟୁ କାମନା କରିବା ପାଇଁ ଏହି ବ୍ରତ ପାଳନ କରାଯାଏ।
ଏହି ପରିପ୍ରେକ୍ଷୀରେ ଚଳିତ ବର୍ଷ ସହରରେ ଥିବା ରାଜସ୍ଥାନି ପରିବାରର ମହିଳା ମାନେ ପୂଜାର ୧୬ ଦିନ ପରେ କୁନ୍ଦନ ମାଷ୍ଟର ଗଳିରୁ ଏକ ଶୋଭା ଯାତ୍ରାରେ ବାହାରି ସହର ପରିକ୍ରମା କରି ରାଧାକୃଷ୍ଣ ମନ୍ଦିର, ରାଧାକୃଷ୍ଣ ମନ୍ଦିରରୁ ସାଗରକୁ ଯାଇ ପ୍ରତିମୂର୍ତ୍ତିକୁ ବିସର୍ଜନ କରିଥିଲେ। ରାଜସ୍ଥାନ ରାଜ୍ୟର ଏ ହେଉଛି ସବୁଠୁ ବଡ଼ ପର୍ବ କହିଲେ ମଧ୍ଯ ଅତ୍ୟୁକ୍ତି ହେବ ନାହିଁ। ବିପ୍ର ଫାଉଣ୍ଡେସନ ତରଫରୁ ଆୟୋଜିତ ଏହି ଉତ୍ସବରେ ଗଙ୍ଗା ଶର୍ମା, ନିନୁ ଶର୍ମା, କୁସୁମ ଶର୍ମା, ଶୋଭା ଶର୍ମା, ଜ୍ୟୋତ୍ସ୍ନା ଶର୍ମା, ନିତୁ ଶର୍ମା, ମଞ୍ଜୁ କମାନି, ଦୁର୍ଗା ଶର୍ମା ପ୍ରମୁଖ ପରିଚାଳନା କରିବାରେ ସହଯୋଗ କରିଥିଲେ।
