ଭୁବନେଶ୍ବର: ଦଳର ବର୍ଷ ବର୍ଷର ପୁରୁଣା ଯୁବନେତାଙ୍କୁ ଅଣଦେଖା କରି, ଅନ୍ୟ ଦଳରୁ ନିକଟରେ ପଦ୍ମ ପୋଖରୀକୁ ଡେଇଁଥିବା ବ୍ୟକ୍ତିଙ୍କୁ କାହିଁକି ଟିକେଟ ଦିଆଯାଉଛି ବୋଲି ଭୁବନେଶ୍ବର-ଏକାମ୍ର ଅଞ୍ଚଳର କିଛି ଦଳୀୟ କର୍ମୀ ପ୍ରତିବାଦ କରଥିଲେ । ବିଜେପି ରାଜ୍ୟ କାର୍ଯ୍ୟାଳୟ ମୁଖ୍ୟ ଗେଟରେ ସେମାନେ ତାଲା ପକାଇ ଧାରଣାରେ ବସିଥିଲେ । ତାଙ୍କ ନେତାଙ୍କୁ ଟିକେଟ ନ ଦେଲେ, ସେମାନେ ଦଳରୁ ସମୁହ ଇସ୍ତଫା ଦେବାକୁ ଧମକ ଦେଇଥିଲେ ।ଗତ ରାତିରେ ଘୋଷଣା କରାଯାଇଥିବା ବିଜେପି ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକାରେ ଭୁବନେଶ୍ବର-ଏକାମ୍ର ବିଧାନସଭା ଆସନରେ ଗତଥରର ଦଳୀୟ ପ୍ରାର୍ଥୀ ଅମୀୟ ଦାଶଙ୍କୁ ବାଦ୍ ଦିଆଯାଇଥିଲା । ଅମୀୟଙ୍କ ବଦଳରେ ନିକଟରେ ବିଜେଡିରୁ ଆସିଥିବା ବାବୁ ସିଂଙ୍କୁ ସେହି ବିଧାନସଭାକ୍ଷେତ୍ରରେ ପ୍ରାର୍ଥୀ କରିଛି ଦଳ । ଏହା ଅନ୍ୟାୟ ଓ ଅଯୌକ୍ତିକ ବୋଲି ପ୍ରତିବାଦ କରି ଦଳର ପୁରୁଣା କର୍ମୀ ଅଭିଯୋଗ କରିଥିଲେ । ସେମାନେ ଦଳର ରାଜ୍ୟ କାର୍ଯ୍ୟାଳୟର ମୁଖ୍ୟ ଗେଟରେ ତାଲା ପକାଇ କାହାରିକୁ ଭିତରକୁ ଛାଡ଼ି ନଥିଲେ ।
ସେହିପରି ଭାବେ କୋରାପୁଟ ଜିଲ୍ଲାର ଲକ୍ଷ୍ମୀପୁର ବ୍ଲକ ବିଜେପି କାର୍ଯ୍ୟାଳୟରେ ଶୁକ୍ରବାର ୪ଜଣ ଆଶାୟୀ ପ୍ରାର୍ଥୀଙ୍କ ସମେତ ଅନେକ ବିଜେପି କର୍ମୀମାନେ ତୁମୁଳକାଣ୍ଡ କରିଛନ୍ତିା ପ୍ରଥମେ ସାମ୍ବାଦିକ ସମ୍ମିଳନୀ କରି ଲକ୍ଷ୍ମୀପୁର ନିର୍ବାଚନ ମଣ୍ଡଳୀର ପ୍ରାର୍ଥୀ କୁମୁଦ ଚନ୍ଦ୍ର ସାଉଁନ୍ତାଙ୍କୁ ନିର୍ବାଚନ ମଣ୍ଡଳୀର ୭ଟି ମଣ୍ଡଳ ସଭାପତିଙ୍କ ସମେତ ଆଶାୟୀ ପ୍ରାର୍ଥୀ ଓ କର୍ମକର୍ତ୍ତା ବିରୋଧ କରୁଥିବା ପ୍ରକାଶ କରିବା ପରେ ତୁରନ୍ତ କର୍ମୀମାନେ ପାର୍ଟି ଅଫିସ ଭଙ୍ଗାରୁଜା କରିବାସହ ପୋଡାଜ୍ୱଳା ଆରମ୍ଭ କରିଦେଇଥିଲୋ
ଏପଟେ ଭୁବନେଶ୍ବର ମୁଖ୍ୟ ଅଫିସ ସମ୍ମୁଖ ରେ ଧାରଣାରେ ବସିଥିବା ଭୁବନେଶ୍ବର-ଏକାମ୍ର ବିଧାନସଭା କ୍ଷେତ୍ରର କର୍ମୀଙ୍କୁ ଖୋଦ୍ ଅମୀୟ ଦାଶ ବୁଝାସୁଝା କରିବା ପରେ ମଧ୍ୟ ସେମାନେ ପ୍ରତିବାଦରୁ ଓହରି ନଥିଲେ । ସେପଟେ, ଦଳର ବର୍ଷୀୟାନ ନେତା ତଥା ପୂର୍ବତନ ମନ୍ତ୍ରୀ ବିଶ୍ୱଭୂଷଣ ହରିଚନ୍ଦନ କିନ୍ତୁ ଆଶାବାଦୀ ଖୁବ୍ ଶୀଘ୍ର ସମାଧାନର ବାଟ ବାହାରିବ । ଉଭୟ କେନ୍ଦ୍ର ଓ ରାଜ୍ୟରେ ନିର୍ବାଚନୀ ସଫଳତା ପରେ ବିଜେପି ଭୋଟ୍ ଗଣତି ପରେ ଅସଲ ହୋଲି ପାଳିବ ବୋଲି ସେ କହିଛନ୍ତି ।
