କଳାହାଣ୍ଡି:(ନରେନ୍ଦ୍ର ନେଗୀ/ଅର୍ଜୁନ ପଟ୍ଟନାୟକ)ଓଡ଼ିଶା ସରକାର ପ୍ରତି ଗାଁକୁ ପାନୀୟଜଳ ର ନାରା ଦେଉଥିଲେ ହେଁ ପ୍ରକୃତ କ୍ଷେତ୍ରରେ ତାର ବିପରୀତ ପରିଲକ୍ଷିତ ହେଉଛି। କେବଳ ସ୍ଲୋଗାନ ଦେଇ ବିଭିନ୍ନ ଯୋଜନା ଗୁଡିକୁ ଅଧାପନ୍ତରିଆ ଛାଡୁଥିବା ବେଳେ ଲୋକେ ପାଣିପାଇଁ ଡହଲ ବିକଳ ହେଉଥିବା ବେଳେ ତଳିଆ କର୍ମଚାରୀ ମାନଙ୍କୁ ଅପ୍ରୀତିକର ପରିସ୍ଥିତି ର ସାମ୍ନା କରିବାକୁ ପଡ଼ୁଛି।ଏହିଭଳି ଏକ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ମୁଖିଗୁଡ଼ା ଗ୍ରାମରେ। ଏଠାରେ ଆରମ୍ଭ ହୋଇଥିବା ମେଗା ଜଳ ଯୋଗାଣ ପ୍ରକଳ୍ପ କାର୍ଯ୍ୟକ୍ଷମ ହୋଇନଥିବା ବେଳେ ବହୁ ପୂର୍ବରୁ କରାଯାଇଥିବା ଜଳଯୋଗାଣ ବ୍ୟବସ୍ଥା କୁ ମରାମତି କରାଯାଇଥିଲେ ମଧ୍ୟ ଜଳ ଯୋଗାଣ ପାଇଁ ଉପଯୁକ୍ତ ହୋଇପାରି ନାହିଁ।
ଯାହାଦ୍ୱାରା ମୁଖିଗୁଡ଼ା ଗ୍ରାମର ପାଇକ ପଡା, ପୁରୁଣା ମାର୍କେଟ,ଗୁନଗୁନିଆ ପଡା, ଭତ୍ରାପଡା, ଜାମନାଲୀପଡା,ଓ ମାଝୀପଡା, ସମେତ ଗ୍ରାମର ବିଭିନ୍ନ କଲୋନୀ ରେ ଆବଶ୍ୟକ ଜଳ ର ଅଭାବ ଦେଖାଦେଇଛି। ଏଥି ପୂର୍ବରୁ ଇନ୍ଦ୍ରାବତୀ କେନାଲ ର ପାଣି କିଛି ଲୋକଙ୍କ ଅନ୍ୟ ଆବଶ୍ୟକତା ପୂରଣ କରୁଥିଲେ ହେଁ ପାନୀୟ ଜଳ ର ଅଭାବ ରହିଥିଲା। ବର୍ତ୍ତମାନ ମରାମତି ପାଇଁ ଦକ୍ଷିଣ ମୁଖ୍ୟ କେନାଲ ବନ୍ଦ ରହୁଥିବା ରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।
ତେଣୁ ମୁଖିଗୁଡ଼ା ର ଜଳ କ୍ଲିଷ୍ଟ ଅଂଚଳକୁ ଜଳ ଯୋଗାଣ ଦାବିରେ ଶତାଧିକ ମହିଳା ଜୟପାଟଣା ବ୍ଳକ କାର୍ଯ୍ୟାଳୟ ଘେରାଉ କରି BDO ଙ୍କୁ ଦାବିପତ୍ର ପ୍ରଦାନ କରିଥିଲେ। ଆଗାମୀ ସାତ ଦିନ ମଧ୍ୟରେ ସମସ୍ୟା ର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। କନିଷ୍ଠ ଯନ୍ତ୍ରୀ ମଧ୍ଯ ସାମାନ୍ୟ ଯାନ୍ତ୍ରିକ ତୃଟି ଓ ଯନ୍ତ୍ରାଂଶ ମିଳିବାରେ ଅସୁବିଧା ଯୋଗୁଁ ସାମୟିକ ବାଧା ସୃଷ୍ଟି ହୋଇଛି ଅତିଶୀଘ୍ର ତାର ନିରାକରଣ ପାଇଁ ବ୍ୟବସ୍ଥା କରାଯିବ ବୋଲି କହିଛନ୍ତି।
