ଟାଟା ଷ୍ଟିଲ୍ ଭୁବନେଶ୍ବର ହାଫ୍ ମାରାଥନ୍‌

Posted on January 14, 2019 at 8:49 am by Aei Odisha

5565 396

ନିଜକୁ ଫିଟ୍‌ ରଖିବା, ସୁସ୍ଥ ରହିବା ସହିତ ଏକ ଉନ୍ନତ ଭବିଷ୍ୟତର ପ୍ରତିଶ୍ରୁତି ରଖୁଥିବା ହାଫ୍ ମାରାଥନ୍‌ରେ ଏକାଧିକ ଅତିଥି ଆସିବା ଉଲ୍ଲେଖନୀୟ ଥିଲା। ଓଲିଉଡ୍‌ର ସଫଳ ଯୋଡ଼ି ସବ୍ୟସାଚୀ ମିଶ୍ର-ଅର୍ଚିତା ସାହୁ ପ୍ରଶଂସକ ଏବଂ ସ୍ଥାନୀୟ ପ୍ରତିଯୋଗୀଙ୍କ ମୁଖ୍ୟ ଆକର୍ଷଣ ଥିଲେ। ପ୍ରତ୍ୟୁଷରୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ଏହାକୁ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। ଉଦ୍‌ଯାପନୀ ଉତ୍ସବରେ ସାଂସଦ ଡକ୍ଟର ପ୍ରସନ୍ନ ପାଟଶାଣୀ, କ୍ରୀଡ଼ାମନ୍ତ୍ରୀ ଚନ୍ଦ୍ରସାରଥୀ ବେହେରା, ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ବିଧାୟକ ପ୍ରିୟଦର୍ଶି ମିଶ୍ର, ବିଜୟ କୁମାର ମହାନ୍ତି, ମେୟର ଅନନ୍ତ ନାରାୟଣ ଜେନା, କ୍ରୀଡ଼ା ସଚିବ ବିଶାଲ କୁମାର ଦେବ, ମୁଖ୍ୟ ବନ୍ୟ ପ୍ରାଣୀ ସଂରକ୍ଷକ ଡକ୍ଟର ସନ୍ଦୀପ ତ୍ରିପାଠୀ, ଖଣି ନିର୍ଦେଶକ ଦୀପକ ମହାନ୍ତି, ଜଙ୍ଗଲ ଓ ପରିବେଶ ବିଭାଗ ସ୍ବତନ୍ତ୍ର ସଚିବ ଦେବୀଦତ୍ତ ବିଶ୍ବାଳ, କ୍ରୀଡ଼ା ନିର୍ଦେଶକ ଭିନୀଲ କ୍ରିଷ୍ଣା ପ୍ରମୁଖ ମୁଖ୍ୟ ଅତିଥି ଥିଲେ। ଟାଟା ଷ୍ଟିଲ୍‌ର କର୍ପୋରେଟ ସେବା ଉପ ସଭାପତି ଚାଣକ୍ୟ ଚୌଧୁରୀ, କଞ୍ଜାମାଲ୍ ଉପ ସଭାପତି ଅରୁଣ ମିଶ୍ର, ମୁଖ୍ୟ ଆବାସିକ କାର୍ଯ୍ୟନିର୍ବାହୀ ଦେବାଶିଷ ଜେନା, ମୁଖ୍ୟ କର୍ପୋରେଟ୍‌ ‌କମ୍ୟୁନିକେସନ୍ସ କୁଲଭିନ୍ ସୁରି ଅତିଥି ଭାବେ ଯୋଗ ଦେଇଥିଲେ।ପ୍ରଥମ ଥର ବରିଷ୍ଠ ତଥା ମୁଖ୍ୟ ପ୍ରତିଯୋଗିତାରେ ଭାଗ‌ ନେଇଥିବା ଓଡ଼ିଆ ଝିଅ ସମ୍‌ସାଦ ଆରା ବେଗମ ମହିଳାଙ୍କ ବର୍ଗରେ ଚତୁର୍ଥ ସ୍ଥାନରେ ରହି ରାଜ୍ୟର ସମ୍ମାନ ରଖିଛନ୍ତି। ଅଧିକାଂଶ ପୁରସ୍କାରକୁ ଅଣ ଓଡ଼ିଆ ଧାବକ ଧାବିକା ଜିତି ନେଇଛନ୍ତି। ଏପରିକି ୧୦ କିଲୋମିଟର ଏବଂ ୫ କିଲୋମିଟର ବର୍ଗରେ ମଧ୍ୟ ରାଜ୍ୟ ବାହାର ଖେଳାଳିଙ୍କ ପ୍ରାଧାନ୍ୟ ଦେଖିବାକୁ ମିଳିଛି। ୨୧ କିଲୋମିଟର୍ ବିଶିଷ୍ଟ ହାଫ୍ ମାରାଥନ୍‌ରେ ରାଜସ୍ଥାନର ଆର୍ମିମ୍ୟାନ୍ ତଥା ହାବିଲଦାର ଗୋବିନ୍ଦ ସିଂହ (୧ ଘଣ୍ଟା ୭ ମିନିଟ୍ ୫୬ ସେକେଣ୍ଡ୍‌) ବିଜେତା ହୋଇଥିଲେ।