ବେଲଗୁଣ୍ଠା:୦୬/୦୫(ସୁଶାନ୍ତ କୁମାର ବେହେରା )ବେଲଗୁଣ୍ଠା କୋଳିସାହି ବାସୀନ୍ଦା କାଳିଆ ପତ୍ର (24) ଆଜି ସକାଳେ ବେଲଗୁଣ୍ଠା ଚିକେନ୍ ବଜାରରେ ବେକରେ ଦଉଡ଼ି ଲଗାଇ ଆତ୍ମହତ୍ୟା କରିଥିବା ଜଣାପଡ଼ିଛି । ଘଟଣାଟି ଭୋର୍ ଚାରିଟା ସମୟରୁ ହୋଇଥିବା ଅନୁମାନ କରାଯାଉଛି । କାଳିଆର ଝୁଲନ୍ତା ଶବକୁ କିଛି ଲୋକ ଦେଖି ତାର ପାରିବାର ଲୋକଙ୍କୁ ଖବର ଦେଇଥିଲେ ।
ଘଟଣା ସଂପର୍କରେ ବେଲଗୁଣ୍ଠା ଥାନା ଅଧିକାରୀ ପ୍ରକାଶ କୁମାର ସାହୁଙ୍କ ନିର୍ଦ୍ଦେଶ କ୍ରମେ ପୋଲିସ୍ ଆସି କାଳିଆର ଶବକୁ ଜବତ କରି 08/23 ରେ ଏକ ଅପମୃତ୍ୟୁ ମାମଲା ରୁଜୁ କରି ବେଲଗୁଣ୍ଠା ଥାନା ଏସ୍ଆଇ ନାରାୟଣ ନାୟକ ଘଟଣାର ତଦନ୍ତ କରୁଛନ୍ତି । କାଳିଆର ଶବକୁ ଭଞ୍ଜନଗର ଉପଖଣ୍ଡ ଚିକିତ୍ସାଳୟରେ ବ୍ୟବଚ୍ଛେଦ କରାଯିବା ପରେ ତାର ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
କାଳିଆର ମାଆ ସୁଷମା ପାତ୍ର ଏନେଇ ବେଲଗୁଣ୍ଠା ଥାନାରେ ଏତାଲା ଦାୟର କରିଛନ୍ତି । ଆତ୍ମହତ୍ୟାର କାରଣ ଅସ୍ପଷ୍ଟ ରହିଛି । ମିଳିଥିବା ତଥ୍ୟ ଅନୁସାରେ ଗତକାଲି କାଳିଆ ଏବଂ ତାର ବଡ଼ ଭାଇଙ୍କ ମଧ୍ୟରେ କୌଣସି ବିଷୟକୁ ନେଇ ଝଗଡ଼ା ହୋଇଥୁଲା । ଏହାକୁ ନେଇ କାଳିଆ ଆତ୍ମହତ୍ୟା କରିଥାଇପାରେ ବୋଲି ଅନୁମାନ କରାଯାଉଛି । ଏନେଇ ବେଲଗୁଣ୍ଠା ପୋଲିସ୍ ଘଟଣାର ତଦନ୍ତ ଜାରି ରଖିଛି ।
