କଣ୍ଟାବାଞ୍ଜି ବ୍ୟୁରୋ: ୨୯/୦୯(ନରେନ୍ଦ୍ର ନେଗୀ)ଜାତି, ବର୍ଣ୍ଣ, ଦଳମତ ନିର୍ବିଶେଷରେ ସମସ୍ତଙ୍କୁ ଏକ ସୁତ୍ରରେ ବାନ୍ଧି ଭାଇଚାରାର ବାର୍ତ୍ତା ପ୍ରଦାନ କରି ମହାପ୍ରଭୁ ବିଘ୍ନରାଜ ଶ୍ରୀଗଣେଶ ଧରାପୃଷ୍ଠରୁ ବିଦାୟ ନେଇଛନ୍ତି । ଅତ୍ୟନ୍ତ ଭକ୍ତିମୟ ତଥା ଭାବପୂର୍ଣ୍ଣ ପରିବେଶ ମଧ୍ୟରେ କଣ୍ଟାବାଞ୍ଜି ବିଭିନ୍ନ ଅନୁଷ୍ଠାନ ଗୁଡିକ ଆଜି ବିଘ୍ନରାଜଙ୍କୁ ମେଲାଣି ଦେଇଥିଲେ ।
ଘଣ୍ଟବାଦ୍ୟ, ନାଚଗୀତରେ ଉଛୁଳି ପଡୁଥିଲା ସମଗ୍ର ଅଞ୍ଚଳ। ସହର ସାରା ଗୀତ ନାଚ ଏବଂ ଶ୍ରୀ ଗଣେଶ ଗଜାନନ ନାଦରେ ଗର୍ଜି ଉଠୁଥିଲା । ଆଜି ସହରର ପ୍ରାୟ ସମସ୍ତ ସ୍ଥାନର ଗଣେଶ ବିସର୍ଜନ କରାଯାଇଛି ।ସେହିଭଳି କଣ୍ଟାବାଞ୍ଜି ଆଶ୍ରମ ପଡ଼ା ରେ ମଧ୍ୟ ମହାପ୍ରଭୁ ଗଣେଶ ଭସାଣି କରାଯାଇଛି। ଏହି ଭସାଣି ସମୟରେ ଦେଖିବାକୁ ମିଳିଛି ଏକ ଭିନ୍ନ ଦୃଶ୍ୟ । ଭାଇଚାରାର ବାର୍ତା ଦେଇ ହିନ୍ଦୁ ମୁସଲିମ ସମ୍ପ୍ରଦାୟର ଭାଇ ମାନେ ମିଶି ଗଣେଶ ଭସାଣି କରିଛନ୍ତି ।
ଆଜି ସକାଳେ ମହମ୍ମଦ ପେଗମ୍ବରଙ୍କ ଜନ୍ମଦିନ ପାଳନ କରିବା ପରେ ସନ୍ଧ୍ୟା ସମୟରେ ଗଣେଶ ଭସାଣି ରେ ଯୋଗ ଦେଇଛନ୍ତି ମୁସଲମାନ ସମ୍ପ୍ରଦାୟର ଭାଇମାନେ । ମହାପ୍ରଭୁ ଗଣେଶ ଭସାଣି କରିବା ସହିତ ଗଣପତି ବାପା ମୋରୀୟା ର ନାରା ଦେଇ ସଦଭାବନା ର ଉଦାହରଣ ଦେଇଛନ୍ତି ।
