ଭବାନୀପାଟଣା:(ଅର୍ଜୁନ ପଟ୍ଟନାୟକ)ନିଖିଳ ଉତ୍କଳ ପ୍ରାଥମିକ ଶିକ୍ଷକ ଫେଡେରେସନ, ଓଡିଶା ଙ୍କ ଆହ୍ଵାନ କ୍ରମେ ସାରା ରାଜ୍ୟରେ ଶିକ୍ଷକ ଙ୍କ “ସମୁହଛୁଟି” ଆନ୍ଦୋଳନ ଦ୍ଵିତୀୟ ଦିନରେ ପହଞ୍ଚିଛି।କଳାହାଣ୍ଡି ଜିଲ୍ଲା ରେ ମଧ୍ଯ ୧୨୯୬ ବିଦ୍ୟାଳୟ ରେ ଗତ ୧୩.୯.୨୦୨୩ ତାରିଖ ଠାରୁ ତାଲାବନ୍ଦ କରି ଶିକ୍ଷକ ମାନେ ସମୁହ ଛୁଟି ଘୋଷଣା ପୂର୍ବକ ଆନ୍ଦୋଳନ ରେ ସାମିଲ ହୋଇଛନ୍ତି। ଜିଲ୍ଲାର ଭବାନୀପାଟଣା, ଜୁନାଗଡ, ଧର୍ମଗଡ଼, ଗୋଲାମୁଣ୍ଡା, କର୍ଲାମୁଣ୍ଡା, ମଦନପୁର ରାମପୁର, ନର୍ଲା, ଲାଞ୍ଜିଗଡ, ଥୁଆମୂଳ ରାମପୁର, କଲମପୁର, କୋକସରା, ଜୟପାଟଣା ଆଦି ସମସ୍ତ ବ୍ଲକ୍ ର ଗୋଷ୍ଠୀ ଶିକ୍ଷା ଅଧିକାରୀ ଙ୍କ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନ କାରୀ ଶିକ୍ଷକ ଶିକ୍ଷୟିତ୍ରୀ ଶାନ୍ତିପୂର୍ଣ୍ଣ ଭାବେ ଗଣଧାରଣା ଦେଇଛନ୍ତି।
ଏ ପରିପ୍ରେକ୍ଷୀରେ କଳାହାଣ୍ଡି ଜିଲ୍ଲାର ଜୟପାଟଣା ବ୍ଲକ ରେ ମଧ୍ଯ ୧୫୬ ସ୍କୁଲ ରେ ତାଲା ବନ୍ଦ କରି ବରିଷ୍ଠ ଶିକ୍ଷକ ପୂର୍ଣ୍ଣଚନ୍ଦ୍ର ପଣ୍ଡା, ସଂଘ ସଭାପତି ବିଜୟ କୁମାର ଯୋଷୀ, ସମ୍ପାଦକ ଲଲିତ କୁମାର ନାଏକଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ପ୍ରାୟ ତିନିଶହ ରୁ ଉର୍ଦ୍ଧ ଶିକ୍ଷକ ଶିକ୍ଷୟତ୍ରୀ ଶାନ୍ତିପୂର୍ଣ୍ଣ ଭାବରେ ବିଭିନ୍ନ ସ୍ଲୋଗାନ ଦେଇ ଜୟପାଟଣା ଗୋଷ୍ଠୀ ଶିକ୍ଷା ଅଧିକାରୀ ଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ଚୁକ୍ତି ଭିତ୍ତିକ ନିଯୁକ୍ତି ପ୍ରଥା ଉଚ୍ଛେଦ, କେନ୍ଦ୍ରୀୟ ହାରରେ ଦରମା ପ୍ରଦାନ, ପୁରୁଣା ପେନସନ ଯୋଜନା ଲାଗୁ ଆଦି ତିନି ଦଫା ଦାବୀ ନେଇ ଆନ୍ଦୋଳନ ଜାରି ରହିଛି।
ପ୍ରମୋଦ କୁମାର ଠାକୁର, ଦିବାକର ପଟ୍ଟନାୟକ, ପ୍ରଫୁଲ୍ଲ ବେହେରା, ଦେବାନନ୍ଦ ବିଶ୍ଵାଳ, ଅଶୋକ କୁମାର ମୁଣ୍ଡ, ରମାକାନ୍ତ ମାଝୀ, ସିଦ୍ଧାର୍ଥ ମିଶ୍ର, ମାନସ ରଞ୍ଜନ ପଣ୍ଡା, ଦେବେନ୍ଦ୍ର ରାଉତ, ଅନନ୍ତ ନାରାୟଣ ପଣ୍ଡା, ଶ୍ରୀକାନ୍ତ ଦଳପତି, ରଶ୍ମୀତା ବେହେରା, ସସ୍ମିତା ନାଏକ,ସନ୍ଧ୍ୟାରାଣୀ ଦାସ ପ୍ରମୁଖ ଙ୍କ ସମେତ ବ୍ଳକ ର ସମସ୍ତ ଶିକ୍ଷକ ଶିକ୍ଷୟିତ୍ରୀ ଧାରଣା ସ୍ଥଳରେ ଉପସ୍ଥିତ ଥିଲେ। ଏହି ଆନ୍ଦୋଳନ ଯୋଗୁଁ ଶିକ୍ଷା ବ୍ଯବସ୍ଥା ସମ୍ପୂର୍ଣ୍ଣ ବିପର୍ଯ୍ଯସ୍ତ ହୋଇ ପଡିଥିବା ବେଳେ ମଧ୍ୟାହ୍ନ ଭୋଜନ କାର୍ଯ୍ୟକ୍ରମ ମଧ୍ଯ ବନ୍ଦ ରହିଛି। ସରକାର ତୁରନ୍ତ ଦାବୀର ସମାଧାନ କରି ଶିକ୍ଷା ବ୍ୟବସ୍ଥା କୁ ନିୟମିତ କରିବାକୁ ବିଭିନ୍ନ ମହଲରୁ ଦାବି ହେଉଛି।
