୫୦କେଜି ଗଞ୍ଜେଇ, ବାଇକ ଓ କାର ଜବତ

ବୌଦ୍ଧ:(ଚିତ୍ତରଞ୍ଜନ ସିଂହ)ବୌଦ୍ଧ ଜିଲ୍ଲା ଘଣ୍ଟାପଡା ଥାନା ପୁଲିସ ପକ୍ଷରୁ ୫୦ ଗଞ୍ଜେଇ ସମେତ ଗୋଟିଏ ବାଇକ ଏବଂ ଏକ କାର ଜବତ କରାଯାଇଛି l ସୂଚନାମତେ ଗଞ୍ଜେଇ ଚୋରା ଚାଲାଣ ହେଉଥିବା ବିଷୟରେ ଏକ ବିଶ୍ୱସ୍ତ ସୂତ୍ର ଆଧାରରେ ଥାନାଧିକାରୀ ଗଣନାଥ ଥନାପତି ଖବର ପାଇ ସଦଳବଳ ସହ ପେଟ୍ରୋଲିଂ କରୁଥିଲେ l ଖୁଣ୍ଟିଗୋରା ପଞ୍ଚାୟତ ଅନ୍ତର୍ଗତ କଳରାକୋଠା ଛକ ନିକଟରେ ସନ୍ଦେହରେ ଗାଡି ଯାଞ୍ଚ କରିଥିଲେ l ପୋଲିସକୁ ଦେଖି ବାଇକ ଏବଂ କାର ଚାଳକ ଦୁହେଁ ଫେରାର ହୋଇଥିଲେ l

ତଦନ୍ତ କରିବାରୁ କାର ଭିତରୁ ଗଞ୍ଜେଇ ବାହାରିଥିଲା l ପୋଲିସ ଗଞ୍ଜେଇ ସମେତ ବାଇକ ଏବଂ କାର ଜବତ କରି ଥାନାକୁ ଆଣିଛି l ସୁଜୁକି ବାଇକ ନଂ. (ଓଡି ୩୧ଡି ୩୭୯୯) ଲେଖାଥିବା ବେଳେ ଏହା ନକଲି ନମ୍ବର ପ୍ଲେଟ ବୋଲି ଜଣାପଡିଛି ସେହିପରି ଏକ ଟୟୋଟା କୋଲାର କାର ନଂ. (ସିଜି ୧୦ଏଫଏ ୮୭୭୨) ଜବତ ହୋଇଥିବା ବେଳେ ଗାଡି ଭିତରୁ ଏକ ନକଲି ନଂବର ପ୍ଲେଟ (ଓଡ଼ି ୦୨ସିଏଫ ୮୭୭୨) ବାହାରିଥିଲା ଏବଂ ଓଡିଶା ସରକାରଙ୍କ ଦ୍ୱାରା ପ୍ରଦତ୍ତ ଏକ ସ୍ମାର୍ଟ ସ୍ୱାସ୍ଥ୍ୟ କାର୍ଡ ମଧ୍ୟ ମିଳିଛି l କାର୍ଡରେ ରବିନାରାୟଣ ଦୀପ ବୋଲି ଉଲ୍ଲେଖ ରହିଛି l

ତେବେ କାର ଗାଡିର ମାଲିକ କନ୍ଧମାଳ ଜିଲ୍ଲା ବାଲିଗୁଡା ଥାନା ଅଞ୍ଚଳର ରବିନାରାୟଣ ଦୀପ ବୋଲି ପୋଲିସ ସୂଚନା ଦେଇଛି l ଜବତ ଗଞ୍ଜେଇର ପରିମାଣ ୫୦କେଜି ହୋଇଥିବା ବେଳେ ଆନୁମାନିକ ମୂଲ୍ୟ ୪ଲକ୍ଷ ୨୦ହଜାର ହେବ ବୋଲି ଜଣାପଡିଛି l ଏନେଇ କେସ ନଂ ୩୯/୨୩ ରେ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରଖିଥିବା ଥାନାଧିକାରୀ ଶ୍ରୀ ଥନାପତି ସୂଚନା ଦେଇଛନ୍ତି l ପେଟ୍ରୋଲିଂ ସମୟରେ ଏଏସଆଇ ପ୍ରଦୀପ କୁମାର ବେହେରା, କନଷ୍ଟେବଳ ଶଶାଙ୍କ ଶେଖର ସାହୁ, ହୋମଗାର୍ଡ ଗିରିଶ ଚନ୍ଦ୍ର କହଁର, ଜଳେଶ୍ୱର କୁମ୍ଭାର, ବସନ୍ତ କୁମ୍ଭାର, ସୁଶାନ୍ତ ମଲିକ ଓ ବିଶ୍ୱଜିତ ପୁଟା ସାମିଲ ଥିଲେ l