ଟିଟିଲାଗଡ଼:( ସଞ୍ଜୟ କୁମାର ନାୟକ)ଟିଟିଲାଗଡ଼ ସରକାରୀ ଡାକ୍ତରଖାନାରେ ଡାକ୍ତରଙ୍କ ଅଭାବ ସହରବାସୀଙ୍କ ପାଇଁ ଏକ ମୁଣ୍ଡ ବ୍ୟଥାର କାରଣ ପାଲଟିଛି। ଅନ୍ୟ ପଟେ କେତେ ଡାକ୍ତର ଆସି ଯୋଗ ଦେଇ କିଛି ଦିନ ପରେ ପଳେଇଲେ, ଯଦ୍ୱାରା ଯେଉଁ ଦୁଃଖକୁ ସେଇ ଦୁଃଖ ହୋଇ ରହିଥିଲା। କିଛି ଦିନ ତଳେ ଟିଟିଲାଗଡ଼ କଂଗ୍ରେସ ଦଳ ପକ୍ଷରୁ ସହରର ବିଭିନ୍ନ ସମସ୍ୟାକୁ ନେଇ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦିଆଯାଇଥିଲା, ସେ ଭିତରେ ଡାକ୍ତର ସମସ୍ୟା ଅନ୍ୟତମ।
କିଛି ମାସ ତଳେ ଆମ ଆଦମୀ ପାର୍ଟି ପକ୍ଷରୁ ମଧ୍ଯ ଗଣଧାରଣା ଏହି ଡାକ୍ତର ଅଭାବ ପାଇଁ ଦିଆଯାଇଥିଲା, ଧାରଣା ଦେବାର କିଛି ଦିନ ଭିତରେ ତିନି ଡାକ୍ତର ଆସି ଯୋଗଦେଲେ, ପୁଣି ସେମାନେ ଛୁଟିରେ ପଳେଇଲେ, ନୂତନ କୋର୍ସ ପାଇଁ ଡାକ୍ତର ଓଁକାର ହୋତା ମଧ୍ଯ ବାହାରକୁ ଗଲେ। ତେବେ ଦିନକୁ ଦିନ ସରକାରୀ ଡାକ୍ତରଖାନାରେ କାର୍ଯ୍ୟରତ ଡାକ୍ତରଙ୍କ ଉପରେ ଚାପ ବଢିଲା, ସବୁ ତଥ୍ଯ ଗ୍ରହଣ କରି ଏହାର ସମାଧାନ ନିମନ୍ତେ ମନ୍ତ୍ରୀ ଶ୍ରୀମତି ଟୁକୁନି ସାହୁ ଭୁବନେଶ୍ବର ଠାରେ ଟିଟିଲାଗଡ଼ ନିର୍ବାଚନ ମଣ୍ଡଳୀର ସ୍ବାସ୍ଥ୍ୟ ସମସ୍ୟା ବିଷୟରେ ଆଲୋଚନା କରିଛନ୍ତି।
ଟିଟିଲାଗଡ଼ର ବିଧାୟିକା ତଥା ମାନ୍ୟବର ଜଳ ସମ୍ପଦ, ବାଣିଜ୍ୟ ଓ ପରିବହନ ମନ୍ତ୍ରୀ ଶ୍ରୀମତୀ ଟୁକୁନି ସାହୁ ଭୁବନେଶ୍ବର ସ୍ଥିତ ଲୋକସେବା ଭବନ କାର୍ଯ୍ୟାଳୟରେ ସ୍ୱାସ୍ଥ୍ୟ ବିଭାଗର ସଚିବ ଶ୍ରୀମତୀ ଶାଳିନୀ ପଣ୍ଡିତ ଓ ବିଭାଗୀୟ ଉଚ୍ଚ ପଦସ୍ଥ ଅଧିକାରୀଙ୍କ ସହିତ ଟିଟିଲାଗଡ଼ ନିର୍ବାଚନ ମଣ୍ଡଳୀ ଅଞ୍ଚଳରେ ସ୍ୱାସ୍ଥ୍ୟ ବିଭାଗର ସମସ୍ୟା ଓ ସମାଧାନ ପାଇଁ ଏକ ସ୍ଵତନ୍ତ୍ର ବୈଠକ କରିଥିଲେ।
ଏହି ବୈଠକରେ ଟିଟିଲାଗଡ଼ ବ୍ଲକ ଅଧକ୍ଷା ଶ୍ରୀମତୀ ସଂଯୁକ୍ତା ନାୟକ, ଟିଟିଲାଗଡ଼ ପୌର ପରିଷଦ ର ଉପାଧକ୍ଷା ଶ୍ରୀମତୀ ପୁଷ୍ପମଞ୍ଜରି ଜାଲ , ଟିଟିଲାଗଡ଼ ବ୍ଲକ ପୂର୍ବତନ ଅଧ୍ୟକ୍ଷା ତଥା ଜିଲ୍ଲା ପରିଷଦ ସଦସ୍ୟ ଶ୍ରୀମତୀ ଗୀତା ବିଶି, ତୁଷୁରା ଅଧକ୍ଷ ଶ୍ରୀ ଅଜୟ ଜୈସୱାଲ୍, ଗୁଡ଼ଭେଲା ବ୍ଳକ ର ଜିଲ୍ଲା ପରିଷଦ ସଦସ୍ୟ ଶ୍ରୀଯୁକ୍ତ ରାମ ନିବାସ ଅଗ୍ରୱାଲ ଉପସ୍ଥିତ ରହି ସ୍ଥାନୀୟ ସମସ୍ୟା ବିଷୟରେ ଆଲୋଚନା କରିଥିଲେ। ଆଗାମୀ ଦିନରେ ସମସ୍ତ ସମସ୍ୟାର କିପରି ଅତି ଶିଘ୍ର ସମାଧାନ ହେବ ସେ ଦିଗରେ କାର୍ଯ୍ୟ କରିଥିବା ବେଳେ ସହରବାସୀ କେବେ ଉପକୃତ ହେବେ ବୋଲି ଲୋକ ଆଶା ବାନ୍ଧି ଅପେକ୍ଷା କରିଛନ୍ତି।
