ସୁବର୍ଣ୍ଣପୁର : (ଅଜିତ କୁମାର ପୁଜାହାରୀ) ସୋନପୁର ମହାବିଦ୍ୟାଳୟର ଓଡ଼ିଆ ଭାଷା ଓ ସାହିତ୍ୟ ବିଭାଗ ପକ୍ଷରୁ ଏକ ରାଜ୍ୟସ୍ତରୀୟ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ” ପ୍ରାକ୍-ସାରଳା ସାହିତ୍ୟ ର ଭାଷା:ଏକ ଅନୁଶୀଳନ ” ଶୀର୍ଷକ ଏହି ଆଲୋଚନାଚକ୍ରରେ ସମ୍ବଲପୁର ବିଶ୍ଵବିଦ୍ୟାଳୟର ଓଡ଼ିଆ ବିଭାଗର ସଂଯୋଜକ ତଥା ବିଶିଷ୍ଟ ଗବେଷକ ଡଃ ଗୋପୀନାଥ ବାଗ ମୁଖ୍ଯଅତିଥି ଭାବରେ ଯୋଗଦେଇ ଆଲୋଚ୍ୟ ବିଷୟ ଉପରେ ତାଙ୍କର ବହୁମୂଲ୍ୟ ବକ୍ତବ୍ୟ ଉପସ୍ଥାପନ କରିଥିଲେ। ଭାଷା ହେଉଛି ଗୋଟିଏ ଜାତିର ପରିଚୟ । ଏକା ଦିନରେ ଭାଷା ସୃଷ୍ଟି ହୋଇଯାଏ ନାହିଁ, ଏଥିପାଇଁ ଦୀର୍ଘ ଦିନ ଅବିରତ ସାଧନାର ଆବଶ୍ୟକତା ରହିଛି। ଆଜି ଆମେ ଯେଉଁ ଶାସ୍ତ୍ରୀୟ ମାନ୍ୟତା ପ୍ରାପ୍ତ ଓଡ଼ିଆ ଭାଷାକୁ ଦେଖୁଛୁ ଏହାର ପଶ୍ଚାତ୍ ରେ ଏକ ସୁଦୀର୍ଘ ସାଧନା ରହିଛି। ସବୁ ଲିଖିତ ସାହିତ୍ୟର ଭାଷାର ଜନନୀ ହେଉଛି ଲୋକଭାଷା । ଓଡ଼ିଆ ଲିଖିତ ସାହିତ୍ୟର ପ୍ରାରମ୍ଭରେ ଲୋକଭାଷା ର ପ୍ରାଚୁର୍ଯ୍ୟ ସହଜରେ ଅନୁଭବ କରିହୁଏ।
ଏହି ମର୍ମରେ ପ୍ରାକ୍ ସାରଳା ସାହିତ୍ୟର ଭାଷା ଖୁବ୍ ଗୁରୁତ୍ୱପୂର୍ଣ୍ଣ ବୋଲି ଡଃ ବାଗ ମତ ଦେଇଥିଲେ। ଅନ୍ୟତମ ଅତିଥି ଭାବେ ଉଲୁଣ୍ଡା ଡିଗ୍ରୀ କଲେଜ ଅଧ୍ୟକ୍ଷ ତଥା ସୁସାହିତ୍ୟିକ ଡଃ ଦେବାଶିଷ ପାଣ୍ଡିଆ ଯୋଗଦେଇ ଆଲୋଚ୍ୟ ବିଷୟରେ ନିଜର ବକ୍ତବ୍ୟ ପ୍ରଦାନ କରିବା ସହ ଛାତ୍ରଛାତ୍ରୀମାନଙ୍କୁ ସାହିତ୍ୟ ଗବେଷଣାର ଧାରା ଉପରେ ଉପାଦେୟ ପରାମର୍ଶ ଦେଇଥିଲେ। ଓଡ଼ିଆ ଭାଷା ଓ ସାହିତ୍ୟ ବିଭାଗର ମୁଖ୍ୟ ଡଃ ସୌରଭ ରଞ୍ଜନ ଖମାରୀ ସଭାର ସଭାପତିତ୍ବ କରିଥିବା ବେଳେ ଅଧ୍ୟାପକ ସରୋଜ କୁମାର ଜଗଦଲା କାର୍ଯ୍ୟକ୍ରମର ସଂଯୋଜନା କରିଥିଲେ। ଏହି ଆଲୋଚନାଚକ୍ରରେ ବିଶିଷ୍ଟ ନାଟ୍ୟକାର ଗବେଷକ ଡଃ ପୁରୁଷୋତ୍ତମ ମିଶ୍ର, ପ୍ରାଧ୍ୟାପିକା ଡକ୍ଟର କଳ୍ପନା ମିଶ୍ର, ଅଧ୍ୟାପିକା ଡଃ ଇତିଶ୍ରୀ ଦାସ, ଅଧ୍ୟାପକ ଡଃ ମୀନକେତନ କୁମ୍ଭାର, ଡଃ ରାଜେନ୍ଦ୍ର ରନା ପ୍ରମୁଖ ଉପସ୍ଥିତ ରହିଥିଲେ। ଏହି ଅବସରରେ ଦେବପ୍ରିୟ ହାତୀ, ସ୍ଵାଗତିକା ଦେହୁରୀ, ସୁବର୍ଣ୍ଣା ବେହେରା, ଘନଶ୍ୟାମ ମାଝି ଆଦି ଛାତ୍ରଛାତ୍ରୀ ତାଙ୍କର ଗବେଷଣାତ୍ମକ ପ୍ରବନ୍ଧ ଉପସ୍ଥାପନ କରିଥିଲେ। ଶେଷରେ ତୃତୀୟ ବର୍ଷର ଛାତ୍ର ଗୁପ୍ତେଶ୍ବର ମେହେର ଧନ୍ୟବାଦ ଅର୍ପଣ କରିଥିଲେ। ବିଭାଗର ସମସ୍ତ ଛାତ୍ରଛାତ୍ରୀ ଉକ୍ତ ଆଲୋଚନା ଚକ୍ର ରେ ଅଂଶଗ୍ରହଣ କରିଥିଲେ।
