ଟିଟିଲାଗଡ:( ସଞ୍ଜୟ କୁମାର ନାୟକ)ଗୁରୁବାର ଏହି ଶୁଭଲଗ୍ନକୁ ବିଶ୍ଵ ପ୍ରତିକ୍ଷୀତ ମାଘଶୁକ୍ଳ ପଞ୍ଚମୀ ସରସ୍ବତୀ ପୂଜା ଓ ଭାରତର ରାଷ୍ଟ୍ରୀୟ ପର୍ବ ସାଧାରଣତନ୍ତ୍ର ଦିବସ ଦୈବ ସଂଯୋଗ । ଏହିଦିନ ସରସ୍ବତୀ ଶିଶୁ ବିଦ୍ୟା ମନ୍ଦିର, ଟିଟିଲାଗଡ଼ ପରିସରରେ ଅନୁଷ୍ଠିତ ହୋଇଥିଲା ଶିଶୁ ବୋଧ ଶ୍ରେଣୀରେ ଅଧ୍ୟୟନରତ ଶିଶୁଙ୍କର ବିଦ୍ୟାରମ୍ଭ ସଂସ୍କାର କାର୍ଯ୍ୟକ୍ରମ। ଦୁଇଶହରୁ ଉର୍ଦ୍ଧ୍ବ ଅଭିଭାବକ ଓ ଅଭିଭାବିକା ସେମାନଙ୍କ ଶିଶୁ ମାନଙ୍କୁ ନେଇ ନିକଟସ୍ଥ ବୈଷ୍ଣଦେବୀ ମନ୍ଦିରରୁ ଆଜ୍ଞାମାଳ ଗ୍ରହଣ କରି ଏକ ଭବ୍ୟ ସଞ୍ଚଳନ କରି ବିଦ୍ୟାଳୟକୁ ପ୍ରବେଶ କରିଥିଲେ।
ପ୍ରଧାନ ଆଚାର୍ଯ୍ୟ ଶ୍ଯାମ ସୁନ୍ଦର ମହାପାତ୍ର ଓ ତାଙ୍କର ସହ ଧର୍ମିଣୀ ଶ୍ରୀମତୀ ତରଙ୍ଗିଣୀ ମହାପାତ୍ର ଶିଶୁଙ୍କର ପଦଧୌତ କରି ଶିଶୁମାନଙ୍କୁ ସ୍ବାଗତ କରିଥିଲେ । ଶିଶୁ ମନ୍ଦିରର ପୂଜନ ମଣ୍ଡପରେ ବିଦ୍ୟାର ଅଧିଷ୍ଠାତ୍ରୀ ଦେବୀ ସରସ୍ଵତୀଙ୍କ ସଭକ୍ତିକ ପୂଜା ସହିତ ପ୍ରଧାନ ଆଚାର୍ଯ୍ୟଙ୍କ ନେତୃତ୍ବରେ ସମସ୍ତ ଅଭିଭାବକ ଅଭିଭାବିକା ୧୦୮ ଥର ସରସ୍ଵତୀଙ୍କ ବୀଜ ମନ୍ତ୍ର ପାଠକରି ଯଜ୍ଞକୁଣ୍ଡରେ ଘୃତାହୂତି ଦେଇ ଶିଶୁଙ୍କ ଖଡ଼ି ଛୁଆଁ କାର୍ଯ୍ୟକ୍ରମ ସମ୍ପାଦିତ କରିଥିଲେ ।
ଶେଷରେ ସମସ୍ତେ ସରସ୍ଵତୀଙ୍କ ସୁଦିବ୍ୟ ପ୍ରସାଦ ନେଇ ଗୃହକୁ ପ୍ରତ୍ୟାବର୍ତନ କରିଥିଲେ, ଶିଶୁ ବାଟିକା ପ୍ରମୁଖା ସଂଯୁକ୍ତା ପାଣିଗ୍ରାହୀଙ୍କ ତତ୍ତ୍ବାବଧାନରେ ସମସ୍ତ ଆଚାର୍ଯ୍ୟ ଆଚାର୍ଯ୍ୟା ଓ ବାଲ ଭାରତୀ, କନ୍ୟା ଭାରତୀର ଛାତ୍ରଛାତ୍ରୀଙ୍କ ସହଯୋଗରେ କାର୍ଯ୍ୟକ୍ରମଟି ସଫଳତାର ସହିତ ସମ୍ପନ୍ନ ହୋଇଥିଲା ।
