ଭବାନୀପାଟଣା : (ନରେନ୍ଦ୍ର ନେଗୀ ଙ୍କ ସହ ଅର୍ଜୁନ ପଟ୍ଟନାୟକ) କଳାହାଣ୍ଡି ଜିଲ୍ଲାର ସୁନ୍ଦର ପ୍ରାକୃତିକ ପ୍ରାଚୁର୍ଯ୍ୟ ଭରା ଓ କଳାହାଣ୍ଡି ର କଶ୍ମୀର ବୋଲାଉଥିବା ଆଦିବାସୀ ଅଧ୍ୟୁଷିତ ଥୁଆମୂଳ ରାମପୁର ବ୍ଲକ କିନ୍ତୁ ଅନ୍ୟାନ୍ୟ କ୍ଷେତ୍ରରେ ବହୁ ପଛୁଆ ଏବଂ ଅବହେଳିତ ଅଞ୍ଚଳ ବୋଲି ପ୍ରମାଣିତ କରିସାରିଛି ପ୍ରଶାସନ।ଉଭୟ କେନ୍ଦ୍ର ଓ ରାଜ୍ୟ ସରକାର ଙ୍କ ବିକାଶ ନାରା ଏହି ବ୍ଲକ୍ ପାଇଁ ମରିଚିକା ସଦୃଶ। ଜିଲ୍ଲା ସଦର ମହୂକୁମାରୁ ପ୍ରତ୍ୟେକ ବ୍ଲକକୁ ରାଜ୍ୟ ରାଜପଥ ଯୋଜନା ମାଧ୍ୟମରେ ଦୀର୍ଘ ଓସାରିଆ ରାସ୍ତା ନିର୍ମାଣ ଲକ୍ଷ୍ୟ ରଖାଯାଇଥିବା ବେଳେ ସବୁବେଳେ ପଛରେ ରହୁଥିବା ଏହି ବ୍ଲକ ଏହି ରାସ୍ତା ନିର୍ମାଣ ପାଇଁ ମଧ୍ୟ ପଛରେ ରହିଛି। ସ୍ବାଧୀନତାର ଦୀର୍ଘ ଦଶନ୍ଧି ପରେ ମଧ୍ଯ ଥୁଆମୂଳ ରାମପୁର ଅଞ୍ଚଳକୁ ଗମନାଗମନ ବ୍ୟବସ୍ଥା ଆଜି ମଧ୍ଯ ଅପହଞ୍ଚ ।ସ୍ଵାଧୀନତା ର ଦୀର୍ଘ ୩୦ ବର୍ଷ ପରେ ଏଠିକାର ଅଞ୍ଚଳବାସୀ ପାଇ ପାରିଥିଲେ ବସ୍ ସେବା।ଜିଲ୍ଲା ସଦର ମହକୁମାକୁ ଗମନାଗମନର ସୁବିଧା ପାଇପାରିଥିଲେ। ବର୍ତ୍ତମାନ ଅଧିକାଂଶ ଅଞ୍ଚଳକୁ ପ୍ରଧାନମନ୍ତ୍ରୀ ସଡକ ନିର୍ମାଣ ହୋଇସାରିଛି ଏବଂ ଏବେବି ଅନ୍ୟ ଅଞ୍ଚଳ ଗୁଡିକୁ ଏହି ସଡକ ନିର୍ମାଣ କାର୍ଯ୍ୟ ଚାଲିଅଛି।କିନ୍ତୁ ଭବାନୀପାଟଣା ଠାରୁ ଥୁଆମୂଳ ରାମପୁର ସଦର ମହକୁମାକୁ ଗମନାଗମନର ସୁବ୍ୟବସ୍ଥା ହୋଇପାରିନି।
ଭବାନୀପାଟଣା ଠାରୁ ଭାୟା ଗୁଣପୁର ଦେଇ ରାୟଗଡା ଜିଲ୍ଲା କାଶୀପୁର ପର୍ଯ୍ୟନ୍ତ ଯେଉଁ ରାଜ୍ୟ ରାଜପଥ ନିର୍ମାଣ କରାଯାଇଛି ତାହା ସିଧାସଳଖ ଭାବେ ଥୁଆମୂଳ ରାମପୁର ସହିତ ସଂଯୋଗ କରାଯାଇନି।ଫଳରେ ଗୁଣପୁର ଠାରୁ ଥୁଆମୂଳ ରାମପୁର ୨୮ କିଲୋମିଟର ଏବଂଥୁଆମୂଳ ରାମପୁର ଠାରୁ ଡୁମେରପଦର ୧୪ କିଲୋମିଟର ପର୍ଯ୍ୟନ୍ତ ରାସ୍ତା ସେଇ ପୂର୍ବ ଭଳି ରହିପଡିଛି।ବର୍ତ୍ତମାନ ଏହା ରାଜ୍ୟ ରାଜପଥ ଯୋଜନାରେ ଟେଣ୍ଡର ହୋଇଥିବା ବେଳେ ସେଇ ଅଣ ଓସାରିଆ ରାସ୍ତା ଉଭୟ ପାର୍ଶ୍ଵର ଅନାବନା ଲଟାବୁଦାରେ ସଂକୀର୍ଣ୍ଣ ହେବାରେ ଲାଗିଛି।ଏହି ରାସ୍ତାର ଅନେକ ସ୍ଥାନ ଖାଲଖମାରେ ଭର୍ତ୍ତି ଯୋଗୁଁ ବିଭିନ୍ନ ସମୟରେ ଦୁର୍ଘଟଣା ମାନ ଘଟୁଥିବା ନଜିର ରହିଛି।ଏହି ରାସ୍ତା ଦେଇ ବଡବଡ ପ୍ରଶାସନିକ ଅଧିକାରୀ,ରାଜନେତା ଏବଂ ବିଭାଗୀୟ ଅଧିକାରୀ ମାନେ ଗସ୍ତ କରୁଥିଲେ ମଧ୍ୟ ସଡକ ପ୍ରତି କାହାରି ଦୃଷ୍ଟି ପଡ଼ୁନାହିଁ ।ଟେଣ୍ଡର ହେଲେ ରାସ୍ତା କାମ ଆରମ୍ଭ ହେବ ବୋଲି କ’ଣ ସେଇ ଦିନ ପର୍ଯ୍ୟନ୍ତ ରାସ୍ତା ମରାମତି ଏବଂ ଉଭୟ ପାର୍ଶ୍ଵର ସେଇ ଅନାବନା ଗଛ ସଫା କରାଯିବ ନାହିଁ ବୋଲି ସାଧାରଣରେ ପ୍ରଶ୍ନ ଉଠୁଛି। ପ୍ରଶାସନର ଏଭଳି ଅବହେଳା ଯୋଗୁଁ ଥୁଆମୂଳ ରାମପୁର ବ୍ଲକ ସବୁବେଳେ ପ୍ରତ୍ୟେକ କ୍ଷେତ୍ରରେ ପଛରେ ପଡିଛି।ଜିଲ୍ଲା ପ୍ରଶାସନ ଏଥିପ୍ରତି ସ୍ଵତନ୍ତ୍ର ଦୃଷ୍ଟି ଦେଇ ଜନସାଧାରଣ ଙ୍କୁ ସର୍ବନିମ୍ନ ମୌଳିକ ସୁବିଧା ସୁଯୋଗ ଯୋଗାଇଦେବା ପାଇଁ ସର୍ବସାଧାରଣ ରେ ଦାବୀ ହେଉଛି।
