ଭୁବନେଶ୍ବର:-ନିର୍ବାଚନ ପୂର୍ବରୁ କୃଷକଙ୍କୁ ଥୋପ ଦେଲେ ରାଜ୍ୟ ସରକାର । କାଳିଆ ଯୋଜନା ନାଁରେ କୃଷକଙ୍କ ପାଇଁ ସରକାର ୧୦ ହଜାର କୋଟି ଟଙ୍କାର ସହାୟତା ଘୋଷଣା କରିଛନ୍ତି । କିଭଳି ଏବଂ କେଉଁମାନେ କାଳିଆ ଯୋଜନାରେ ଉପକୃତ ହେବେ ତାର ସ୍ପଷ୍ଟ ରୂପରେଖ ବି ପ୍ରସ୍ତୁତ ହୋଇଛି । ଏନେଇ ବସିଥିବା କ୍ୟାବିନେଟ୍ ବୈଠକରେ ମୋହର ବାଜିଛି ।ଆସନ୍ତା ନିର୍ବାଚନକୁ ଆଖି ଆଗରେ ରଖି କେଂଗ୍ରସ ଓ ବିେଜପି ଶାସିତ ରାଜ୍ୟମାନେ ଚାଷୀଙ୍କ ଋଣ ଛା଼ଡ କରୁଥିବାବେଳେ ଏ ସଂକ୍ରାନ୍ତ ଚାପକୁ ଏଡ଼ାଇ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏମିତି ଢଙ୍ଗରେ ବିକଳ୍ପ ତଥା ଐତିହାସିକ ନିଷ୍ପତ୍ତି ଶୁଣାଇଛନ୍ତି। ଅଳ୍ପ କିଛି ଚାଷୀଙ୍କୁ ଥରୁଟିଏ ଋଣଛାଡ଼ କରି ରାଜ୍ୟର ଅର୍ଥନୀତିକୁ ଢେର୍ ବର୍ଷ ଯାଏ ବିପର୍ଯ୍ୟୟ ମୁହଁକୁ ଠେଲି ଦେବା ବଦଳରେ କୃଷକର ଜୀବନ ଜୀବିକା ବୃଦ୍ଧି ପାଇଁ ସହାୟତା ତଥା ରୋଜଗାର ବୃଦ୍ଧି କରିବା ଲକ୍ଷ୍ୟରେ ୧୦ ହଜାର େକାଟି ଟଙ୍କାର ‘କାଳିଆ’ (କୃଷକ ଆସିଷ୍ଟାନ୍ସ ଫର୍ ଲାଇଭ୍ଲିହୁଡ୍ ଆଣ୍ଡ ଇନକମ୍ ଅଗମେଣ୍ଟେସନ୍) ଯୋଜନା ଘୋଷଣା କରିଛନ୍ତି।
ଚାଷୀ, ଭାଗ ଚାଷୀ, କ୍ଷୁଦ୍ର ଏବଂ ନାମମାତ୍ର ଚାଷୀଙ୍କୁ ଯୋଜନାରେ ସହାୟତା ମିଳିବ। ଏ ଯୋଜନାରେ ପ୍ରତି ବର୍ଷ ଚାଷୀ ପରିବାରକୁ ଖରିଫ ଋତୁ ପାଇଁ ୫ ହଜାର ଓ ରବି ଋତୁ ପାଇଁ ୫ ହଜାର ଟଙ୍କାର ଆର୍ଥିକ ସହାୟତା ଯୋଗାଇ ଦିଆଯିବ।ଏହି ଟଙ୍କାରେ ବିହନ, ସାର, କୀଟନାଶକ ଆଦି କିଣି ପାରିବ। ସେହିଭଳି ଚାଷ ଜମି ନଥିବା କୃଷକଙ୍କୁ ଛେଳି, ବତକ ପାଳନ, ମାଛ ଚାଷ ପାଇଁ ବି ସହାୟତା ମିଳିବ। ଏ ଯୋଜନାରେ ପରିବାର ପିଛା ୧୨, ୫୦୦ ଟଙ୍କା ସହାୟତା ମିଳିବ। ସେହିଭଳି ଭୂମିହୀନ ଶ୍ରମିକ ଓ ସାମ୍ଭାବ୍ୟ ଆପଦଗ୍ରସ୍ତ ଚାଷୀ ପରିବାରକୁ ଚାଷ ଓ ଜୀବିକା ପାଇଁ ୧୦ ହଜାର ଟଙ୍କାର ଆର୍ଥିକ ସହାୟତା ରାଶି ମିଳିବ। ଏଥିପାଇଁ ପଞ୍ଚାୟତ ମାଧ୍ୟମରେ ହିତାଧୀକାରୀ ଚୟନ କରାଯିବ।ମୁଖ୍ୟମନ୍ତ୍ରୀ କ୍ୟାବିେନଟ୍ ନିଷ୍ପତ୍ତି ଶୁଣାଉଥିବା ବେଳେ ରାଜସ୍ବ ମନ୍ତ୍ରୀ ମହେଶ୍ବର ମହାନ୍ତି, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ତଥା ସମବାୟ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର, କୃଷି ମନ୍ତ୍ରୀ ପ୍ରଦୀପ ମହାରଥୀ ଓ ସୂଚନା ଏବଂ ଲୋକସଂପର୍କ ମନ୍ତ୍ରୀ ପ୍ରତାପ ଜେନା, ମୁଖ୍ୟଶାସନ ସଚିବ ଆଦିତ୍ୟ ପ୍ରସାଦ ପାଢୀ ଉପସ୍ଥିତ ଥିେଲ।
