ବୌଦ୍ଧ:୧୦ା୫(ଚିତ୍ତରଞ୍ଜନ ସିଂହ)ଜିଲାପାଳ ସତ୍ୟରଂଜନ ସାହୁ ବୁଧବାର ପୂର୍ବାହ୍ନରେ ଅଚାନକ ଭାବରେ ବୌଦ୍ଧଜିଲା ମୁଖ୍ୟଚିକିତ୍ସାଳୟରେ ପହି ସ୍ୱାସ୍ଥ୍ୟସେବା ତଦାରଖ କରିବା ସହିତ ବିଭିନ୍ନ ୱାର୍ଡ ବୁଲି ସମସ୍ୟା ଅନୁଧ୍ୟାନ କରିଥିଲେ । ଜିଲାପାଳ ଶ୍ରୀସାହୁ ରୋଗୀ ଓ ରୋଗୀମାନଙ୍କ ସଂପର୍କିୟମାନଙ୍କ ସହିତ ଆଲୋଚନା କରି ଚିକିତ୍ସାଳୟରେ ମିଳୁଥିବା ସୁବିଧାସୁଯୋଗ ଓ ସମସ୍ୟା ସଂପର୍କରେ ପଚାରି ବୁଝିଥିଲେ । ମୁଖ୍ୟଚିକିତ୍ସାଳୟର ବର୍ହିବିଭାଗ ପରିଦର୍ଶନ କରିବା ସହିତ ବିଭିନ୍ନ ବିଶେଷଜ୍ଞ ଡାକ୍ତରମାନଙ୍କ ସ୍ୱତନ୍ତ୍ର କକ୍ଷ ପରିଦର୍ଶନ କରି ରୋଗୀସେବା ଅନୁଧ୍ୟାନ ଓ ସମସ୍ୟା ସଂପର୍କରେ ପଚାରି ବୁଝିଥିଲେ ।
ମୁଖ୍ୟଚିକିତ୍ସାଳୟ ମଧ୍ୟରେ ଚିକିତ୍ସାଧିନ ରୋଗୀଙ୍କ ସଂପର୍କିୟ ଓ ପ୍ରତିଦିନ ବର୍ହିବିଭାଗକୁ ଚିକିତ୍ସା ପାଇଁ ଆସୁଥିବା ଲୋକମାନେ ଭିଡ ଜମାଉଥିବାରୁ ସମସ୍ତଙ୍କ ବସିବା ପାଇଁ ସ୍ୱତନ୍ତ୍ର ବ୍ୟବସ୍ଥା ସହିତ ଭିଡ କମାଇବାକୁ ରୋଗୀଙ୍କ ସଂପର୍କିୟମାନଙ୍କୁ ସୂଚନା ପ୍ରଦାନ ପାଇଁ ମାଇକ୍ ବ୍ୟବସ୍ଥା କରିବାକୁ ଜିଲାପାଳ ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଥିଲେ । ଏଥିସହିତ ଚିକିତ୍ସାଳୟ ପରିସରରେ ଜମା ହୋଇ ରହିଥିବା ବର୍ଯ୍ୟବସ୍ତୁକୁ ତୁରନ୍ତ ସଫା କରାଇବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ । ପୁରୁଣା ଜେଲ କୋଠାରେ ଚାଲିଥିବା କୋଭିଡ ସ୍ୱାସ୍ଥ୍ୟ ନିକଟରେ ପ୍ରସ୍ତାବିତ ସ୍ୱତନ୍ତ୍ର ୨୦ ଶଯ୍ୟା ବିଶିଷ୍ଟ କିଡନୀ ୱାର୍ଡର କ୍ଷେତ୍ର ପରିଦର୍ଶନ କରିଥିଲେ ।
ଦୁଷିତ ପାନୀୟଜଳ ଯୋଗୁଁ ଜିଲାରେ ଶହ ଶହ ସଂଖ୍ୟାରେ କିଡନୀ ରୋଗୀ ଚିହ୍ନଟ ହୋଇ ଚିକିତ୍ସାଧିନ ଥିବାବେଳେ ଅନେକ ରୋଗୀ ଡାଇଲିସିସ ହେଉଛନ୍ତି । ଏହିଭଳି ପରିସ୍ଥିତିରେ ଏକ ସ୍ୱତନ୍ତ୍ର କିଡନୀ ୱାର୍ଡ ପ୍ରତିଷ୍ଠା ପାଇଁ ଜିଲାପାଳ ଶ୍ରୀସାହୁ ଗୁରୁତ୍ୱାରୋପ କରିବାସହ ତୁରନ୍ତ ପୁରୁଣା ଜେଲ କୋଠାରେ କିଡନୀ ୱାର୍ଡ ପ୍ରତିଷ୍ଠା ଓ କାର୍ଯ୍ୟକ୍ଷମ କରିବା ପାଇଁ ପଦକ୍ଷେପ ନେବାକୁ ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଥିବା ଜଣାଯାଇଛି । ଏହି ପରିଦର୍ଶନ ସମୟରେ ଜିଲା ମୁଖ୍ୟଚିକିତ୍ସାଳୟର ଅଧିକ୍ଷକ ଡାକ୍ତର ସଂଘମିତ୍ରା ପଣ୍ଡା,ଡେପୁଟି କଲେକ୍ଟର ଚନ୍ଦ୍ରକାନ୍ତ ବେହେରା,ଝରଣା ପ୍ରଧାନ,ଜିଲା ସୂଚନା ଓ ଲୋକସଂପର୍କ ଅଧିକାରୀ ରିତାକାନ୍ତି ବଳିୟାରସିଂହ ଓ ସ୍ୱାସ୍ଥ୍ୟ ବିଭାଗର ଅଧିକାରୀମାନେ ଉପସ୍ଥିତଥିଲେ ।
