ଯାଜପୁର:ଶବ ନେଇ ଦାହ ପାଈଁ ଆସିଥିଲେ ନିଜେ ଶବ ହୋଇଗଲେ ଯୁବକ। ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଥାନା ବୈତରଣୀ ନଦୀ ଦଶାଶ୍ବମେଧ ଘାଟରେ। ମୃତକ ହେଲେ ଦଶରଥପୁର ବ୍ଲକ ରାମବାଗ ହୀରାପୁର ଅଞ୍ଚଳର ନିଶିକାନ୍ତ ମଲ୍ଲିକ । ନିଶିକାନ୍ତ ସମ୍ପର୍କୀୟ ଙ୍କ ଶବ ସତ୍କାର କରିବା ପାଇଁ ଯାଜପୁର ଦଶାଶ୍ବମେଧ ଘାଟ ନିକଟସ୍ଥ ବାରୁଣୀ ପଡିଆରେ ଥିବା ମହାଶ୍ମଶାନକୁ ନେଇ ଆସିଥିଲେ।
ଦାହ କାର୍ଯ୍ୟ ଶେଷ ହେବା ପରେ ବୈତରଣୀ ନଦୀର ଦଶାଶ୍ବମେଧ ଘାଟକୁ ଗାଧୋଇବାକୁ ଯାଇଥିଲେ। ସେଠାରେ ନଦୀରେ ବୁଡିଯାଇଥିଲେ। ଦୀର୍ଘ ସମୟ ଖୋଜାଖୋଜି ପରେ ନିଶିକାନ୍ତଙ୍କୁ ପାଣି ଭିତରୁ ଉଦ୍ଧାର କରଯାଇଥିଲା। ହେଲେ ବେଆଇନ୍ ଭାବେ ଖୋଳା ଯାଉଥିବା ବାଲିଘାଟ ଯୋଗୁଁ ପାଣିରେ ବୁଡି ମୃତ୍ୟୁ ବରଣ କରିଥିବା ପରିବାର ବର୍ଗ ଅଭିଯୋଗ କରିଛନ୍ତି ।
ନଦୀ ଶୁଖିଲା ଥିବାବେଳେ ବାଲି ଖୋଳା ହେତୁ ଏପାରି ଘଟିଛି। ତେବେ ଯାଜପୁର ଦମକଳ ବାହିନୀ ଆସି ମୃତ ନିଶିକାନ୍ତ ମଲ୍ଲିକକୁ ଉଦ୍ଧାର କରି ଯାଜପୁର ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ। ଯାଜପୁର ପୋଲିସ ମୃତ ଶରୀର ଜବତ କରି ଘଟଣାର ତଦନ୍ତ ଜାରି ରଖିଛି।
