ସୁବର୍ଣ୍ଣପୁର:(ଅଜିତ କୁମାର ପୁଜାହାରୀ)ନାବାଳିକା ଅପହରଣ ମାମଲାରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କଲା ତରଭା ପୋଲିସ I ପୋଲିସର ସୂଚନା ମୁତାବକ ଗତ ଜାନୁୟାରୀ ୩ ତାରିଖ ଦିନ ସୁବର୍ଣ୍ଣପୁର ଜିଲ୍ଲା ପାଇକବାହାଲ ଗ୍ରାମର ୧୭ ବର୍ଷର ନାବାଳିକା ଝିଅର ଅପହରଣ କରାଯାଇଥିବା ନେଇ ତରଭା ଥାନାରେ ଲିଖିତ ଅଭିଯୋଗ ହୋଇଥିଲା I
ପରେ ତରଭା ପୋଲିସ ଏକ ମାମଲା ରୁଜୁ କରିବା ସହ ଏକ ସ୍ବତନ୍ତ୍ର ଟିମ ଗଠନ କରି ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି ପୋଲିସ I ଗିରଫ ଅଭିଯୁକ୍ତ ମାନଙ୍କ ମଧ୍ୟରୁ ଜଣେ ତରଭା ଥାନା ଅନ୍ତର୍ଗତ ଦେଉଳପଦର ଗ୍ରାମର ବିନୟ ବାଗ ପିତା ସୁଶୀଲ ବାଗ ଓ ବୌଦ୍ଧ ଜିଲ୍ଲା ମନମୁଣ୍ଡା ଥାନା ଅନ୍ତର୍ଗତ ତାଙ୍କ ସହଯୋଗୀ ଭିଣୋଇ ବିଶ୍ୱଜିତ ହରିପାଲ ବୋଲି ଜଣା ପଡିଛି I
ଅଭିଯୁକ୍ତ ଦ୍ବୟ ନାବାଳିକାକୁ ନେଇ ମହାରାଷ୍ଟ୍ର ରାଜ୍ୟର ମୁମ୍ବାଇର ଠାଣେ ଥାନା ଅନ୍ତର୍ଗତ ଦିଭା ଠାରେ ଲୁଚାଇଥିବା ପୋଲିସ ଖବର ପାଇଥିବାବେଳେ ତରଭା ପୋଲିସର ତିନି ଜଣିଆ ଟିମ ଯାଇ ନାବାଳିକା ଝିଅକୁ ଉଦ୍ଧାର କରିବା ସହିତ ଅଭିଯୁକ୍ତ ଦ୍ବୟଙ୍କୁ ଧରିବାରେ ସଫଳ ହୋଇ ତରଭା ଥାନାକୁ ଆଣିଥିଲେ I ତେବେ ନାବାଳିକା ଝିଅର ଡାକ୍ତରୀ ମାଇନା କରାଯାଇଥିବା ବେଳେ ଆଜି ଅଭିଯୁକ୍ତ ଦ୍ବୟଙ୍କୁ କୋର୍ଟ ଚାଲାଣ କରାଯାଇଥିବା ନେଇ ଥାନାଧିକାରୀ ସୁବ୍ରତ ପାଣିଗ୍ରାହୀ ସୂଚନା ଦେଇଛନ୍ତି I
