ଯାଜପୁର:ଛଅଦିନ ଧରି ଚାଲିଥିବା ଯାଜପୁର ମହୋତ୍ସବ ଆଜି ଉଦ୍ଯାପିତ ହୋଇଛି। ଶେଷ ସନ୍ଧ୍ୟାରେ ବଲିଉଡ କଣ୍ଠଶିଳ୍ପୀ ସାରିକା ସିଂଙ୍କ ଓଡ଼ିଆ ଗୀତ ଅଭିମାନିନୀ ଏ ଅମାନିଆ ଢେଉ…ର ତାଳେତାଳେ ଦର୍ଶକ ଝୁମିଥିଲେ। ସ୍ଥାନୀୟ କଳାକାରଙ୍କ ସମେତ ଜ୍ୟାକସ୍ନ୍ ଡ୍ୟାନ୍ସ ଗ୍ରୁପ୍ ଓ ଡିଏଭି ଡ୍ୟାନ୍ସ ଗ୍ରୁପ୍ଙ୍କ ନୃତ୍ୟରୁ ଆଜିର ସାଂସ୍କୃତିକ ସନ୍ଧ୍ୟା ଆରମ୍ଭ ହୋଇଥିଲା। ଓଡ଼ିଆ ଅଭିନେତା ପୁପିନ୍ଦର ଓ ଗୁନଗୁନ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ବିଦେଶରୁ ଆସିଥିବା ୧୦ଜଣ ଚିତ୍ରଶିଳ୍ପୀଙ୍କୁ ସମ୍ବର୍ଦ୍ଧିତ କରାଯାଇଛି।୮ ତାରିଖରୁ ଆରମ୍ଭ ହୋଇଥିବା ଏହି ମହୋତ୍ସବ ପାଇଁ ଯାଜପୁର ସହର ସମେତ ପୂରା ଜିଲ୍ଲାରେ ଉତ୍ସବର ମାହୋଲ ସୃଷ୍ଟି ହୋଇଥିଲା।
ଦୈନିକ ବଲିଉଡ୍ ଏବଂ ଓଲିଉଡ୍ କଳାକାରଙ୍କ ସାଂସ୍କୃତିକ କାର୍ଯ୍ୟକ୍ରମ ଦେଖିବାକୁ ଲକ୍ଷାଧିକ ଦର୍ଶକ ଆସୁଥିଲେ। ପ୍ରଥମ ଦିନ ବଲିଉଡ୍ର ସୁନିଧି ଚୌହାନ, ଦ୍ବିତୀୟ ଦିନ ଆୟୁଷ୍ମାନ ଖୁରାନା, ତୃତୀୟ ଦିନ ଅମିତ ତ୍ରିବେଦୀ, ଚତୁର୍ଥ ଦିନ ଜାଭେଦ ଅଲ୍ଲୀ, ପଞ୍ଚମ ଦିନ ଶ୍ରେୟା ଘୋଷାଲ ଯାଜପୁର ମହୋତ୍ସବ ମଞ୍ଚକୁ ରଙ୍ଗିନ କରିଥିଲେ। ଲୋକେ ସାଂସ୍କୃତିକ କାର୍ଯ୍ୟକ୍ରମ ଦେଖିବା ସହ ପଲ୍ଲିଶ୍ରୀ ମେଳାରୁ ମହିଳାଙ୍କ ହାତ ତିଆରି ସାମଗ୍ରୀ କିଣିଥିଲେ। ଏଥିସହ ଚାଷୀଙ୍କୁ ରିହାତି ମୂଲ୍ୟରେ କୃଷି ଯନ୍ତ୍ରପାତି ବିକ୍ରି ରେକର୍ଡ କରିଛି। ୬ ଦିନରେ ଏହି ମେଳାରେ ୪ କୋଟି ଟଙ୍କା ଜିନିଷ ବିକ୍ରି ହୋଇଥିବା ପ୍ରଶାସନ କହିଛି। ସେହିପରି ପଲ୍ଲିଶ୍ରୀ ମେଳାରେ ମଧ୍ୟ ୨୨୦ଟି ଷ୍ଟଲ୍ରେ ଏସ୍ଏଚ୍ଜି ମହିଳାମାନେ ଭଲ ବ୍ୟବସାୟ କରିଛନ୍ତି। ଏହି ଉତ୍ସବର ସଫଳତା ପାଇଁ ପ୍ରଶାସନ ପକ୍ଷରୁ ସମସ୍ତଙ୍କୁ ଧନ୍ୟବାଦ ଦିଆଯାଇଛି।
