ସମ୍ବଲପୁର: ୨୩/୧୧ (ରମାକାନ୍ତ ବିଶ୍ବାଳ)ହୀରାକୁଦର ଜଳଭଣ୍ଡାର ଅକାତ କାତ ଜଳରାଶି ମଧ୍ୟରେ ରହିଛି ରହସ୍ୟମୟ ବାଦୁଡି ଦ୍ବୀପ । ରହସ୍ୟ ଓ ରୋମାଞ୍ଚ ଭରା ଏହି ଦ୍ବୀପରେ ରହୁଛନ୍ତି ହଜାର ହଜାର ବିରଳ ବାଦୁଡି । କୌଣସି ଦୈବୀ ଶକ୍ତି ଦ୍ବୀପଟିର ସୁରକ୍ଷା କରୁଥିବା ଯୋଗୁଁ ବାଦୁଡିମାନେ ନିର୍ଭୟରେ ବାସ କରୁଥିବା ବିଶ୍ବାସ କରନ୍ତି ସ୍ଥାନୀୟ ମତ୍ସ୍ୟଜୀବୀ ।ଏସିଆର ଦୀର୍ଘତମ ନଦୀବନ୍ଧ ହେଉଛି ହୀରାକୁଦ ଜଳଭଣ୍ଡାର । ଜଳ ସେଚନ, ବିଦ୍ୟୁତ ଉତ୍ପାଦନ ଓ ବନ୍ୟା ନିୟନ୍ତ୍ରଣରେ ହୀରାକୁଦ ଜଳଭଣ୍ଡାର ଓଡିଶାବାସୀଙ୍କୁ ସେବା ଯୋଗାଇ ଆସୁଛି । ତେବେ ହୀରାକୁଦର ବିଶେଷତ୍ବ କେବଳ ଏତିକି ନୁହେଁ, ଏହି ଜଳଭଣ୍ଡାର ସହ ଯୋଡି ହୋଇ ରହିଛି ଅନେକ ରହସ୍ୟମୟ କଥା ।
ଯେପରିକି ଅଥଳ ଜଳରାଶିର ମଧ୍ୟ ଭାଗରେ ରହିଛି ଅନେକ ରହସ୍ୟମୟ ଦ୍ବୀପ । ଏଗୁଡିକ ହେଲା ବ୍ୟାଟ୍ ଆଇଲ୍ୟାଣ୍ଡ, ସନରାଇଜ ଆଇଲ୍ୟାଣ୍ଡ ଓ କ୍ୟାଟେଲ ଆଇଲ୍ୟାଣ୍ଡ । ହେଲେ ଏସବୁ ଭିତରେ ଅଧିକ ରହସ୍ୟ ଓ ରୋମାଞ୍ଚକର ହେଉଛି ବ୍ୟାଟ୍ ଆଇଲ୍ୟାଣ୍ଡ ବା ବାଦୁଡି ଦ୍ବୀପ । ଏହି ଦ୍ବୀପରେ ଏକ ବିରଳ ପ୍ରଜାତିର ହଜାର ହଜାର ସଂଖ୍ୟାକ ବାଦୁଡି ବସବାସ କରୁଛନ୍ତି ।
ହୀରାକୁଦ ଜଳଭଣ୍ଡାର ମଧ୍ୟରେ ବାଦୁଡି ଦ୍ବୀପରେ ଭରି ରହିଛି ଅନେକ ରହସ୍ୟଏହି ବାଦୁଡି ଦ୍ବୀପଟି ଯେତିକି ରହସ୍ୟମୟ ଏଠାକୁ ଯିବା ଆହୁରି ଅଧିକ ରୋମାଞ୍ଚକର । ହୀରାକୁଦ ଦେବ୍ରିଗଡ ନେଚର କ୍ୟାମ୍ପରୁ ୨ କିଲୋମିଟରେ ଦୂରରେ ରହିଛି ବାଦୁଡି ଆଇଲ୍ୟାଣ୍ଡ । ଏହି ସ୍ଥାନକୁ ଜଳଭଣ୍ଡାରର ୧୫୦ ଫୁଟ ଗଭୀର ଜଳରାଶିରେ ବୋଟ ଯୋଗେ ଯିବାକୁ ପଡେ ଏବଂ ଗନ୍ତବ୍ୟସ୍ଥଳରେ ପହଞ୍ଚିବାକୁ ପ୍ରାୟ ଅଧଘଣ୍ଟା ସମୟ ଲାଗେ । ବାଦୁଡି ଦ୍ବୀପ ମଧ୍ୟରେ ରହିଛି ଘଞ୍ଚ ଜଙ୍ଗଲ । ଏଠାରେ ଇଣ୍ଡିଆନ ଫ୍ଲାଇଂ ଫକ୍ସ ପ୍ରଜାତିର ବିରଳ ବଦୁଡି ରହୁଛନ୍ତି । ଏମାନେ ଶାକାହାରୀ ଅଟନ୍ତି । ପ୍ରାୟ ୫୦ ବର୍ଷରୁ ଅଧିକ ବର୍ଷ ଧରି ଦ୍ବୀପ ମଧ୍ୟରେ ବାଦୁଡିମାନେ ରହୁଥିବା କୁହାଯାଉଛି । ଦିନବେଳେ ଘଞ୍ଚ ଅରଣ୍ୟର ଡେଙ୍ଗା ଡେଙ୍ଗା ଗଛରେ ଏହି ବାଦୁଡିମାନେ ଆରାମ କରୁଥିବା ଦେଖିବାକୁ ମିଳନ୍ତି । ଏମାନଙ୍କ କାକଳି ଦ୍ବୀପ ମଧ୍ୟରେ ଏକ ନିଆରା ଓ ମଧୁର ପରିବେଶ ସୃଷ୍ଟି କରିଥାଏ ।
ତେବେ କାହିଁକି ଏଠାରେ ଏତେ ସଂଖ୍ୟାରେ ବାଦୁଡି ରୁହନ୍ତି ତାହା ଏକ ବଡ଼ ରହସ୍ୟ ।ସ୍ଥାନୀୟ ମତ୍ସ୍ୟଜୀବୀଙ୍କ କହିବା ଅନୁଯାୟୀ, ବାଦୁଡି ଦ୍ବୀପଟି ଏକ ଦେବଂଶୀ ସ୍ଥାନ । କୌଣସି ଦୈବୀ ଶକ୍ତି ସ୍ଥାନଟିର ସୁରକ୍ଷା କରୁଛନ୍ତି । ସେଥିପାଇଁ ଦ୍ବୀପରେ ହଜାର ହଜାର ବାଦୁଡି ନିର୍ଭୟରେ ରହୁଛନ୍ତି । ଅନ୍ୟପଟେ ପ୍ରାଣୀ ବିଶେଷଜ୍ଞଙ୍କ କହିବା ମୁତାବକ, ଏଠିକାର ନିରୋଳା ପରିବେଶ ସାଙ୍ଗକୁ ଶୀତଳ ପ୍ରାକୃତିକ ଜଳବାୟୁ ଓ ଦ୍ବୀପଟି ଶିକାରୀଙ୍କ ଠାରୁ ଅପହଞ୍ଚ ହୋଇଥିବାରୁ ଏଠାରେ ଏହି ବାଦୁଡି ରହୁଛନ୍ତି ।
ଅନ୍ୟପଟେ ବର୍ତ୍ତମାନ ରାଜ୍ୟ ସରକାର ଏହି ବାଦୁଡି ଦ୍ବୀପକୁ ପଶ୍ଚିମ ଓଡ଼ିଶାର ପର୍ଯ୍ୟଟନ ମାନଚିତ୍ରରେ ଏକ ସ୍ବତନ୍ତ୍ର ପରିଚୟ ଦେବାକୁ ଚେଷ୍ଟା କରୁଛନ୍ତି । ଏହି ରହସ୍ୟମୟ ଦ୍ବୀପର ବିକାଶ କରାଯାଇ ବିପୁଳ ମାତ୍ରାରେ ପର୍ଯ୍ୟଟକଙ୍କୁ କିପରି ଆକର୍ଷିତ କରିବାକୁ ଲକ୍ଷ୍ୟ ରହିଛି । ବର୍ତ୍ତମାନ କେବଳ ଡେବ୍ରିଗଡ ନେଚର କ୍ୟାମ୍ପରେ ରହୁଥିବା ପର୍ଯ୍ୟଟକଙ୍କ ପାଇଁ ତାଙ୍କ ଟୁର୍ ପ୍ୟାକେଜରେ ଏହି ଦ୍ବୀପ ଭ୍ରମଣର ସୁଯୋଗ ଦିଆଯାଉଛି। ଏଥିପାଇଁ ଦ୍ବୀପଟିରେ ପର୍ଯ୍ୟଟକଙ୍କ ଲାଗି ସ୍ବତନ୍ତ୍ର ବ୍ୟବସ୍ଥା କରାଯାଉଛି ।
ଏଥିସହ ବାଦୁଡିଙ୍କ ସୁରକ୍ଷା ଲାଗି କିଛି ସ୍ଥାନୀୟ ମତ୍ସ୍ୟଜୀବୀଙ୍କୁ ଏଠାରେ ଜଗୁଆଳୀ ଭାବେ ରଖାଯାଇଛି । ମତ୍ସ୍ୟଜୀବୀମାନେ ଆଗକୁ ପର୍ଯ୍ୟଟକଙ୍କ ପାଇଁ ଇକୋ ଗାଇଡ଼ ଭାବେ କାର୍ଯ୍ୟ କରିବେ ବୋଲି ବନ ବିଭାଗ ପକ୍ଷରୁ କୁହାଯାଇଛି ।ଏହି ରହସ୍ୟମୟ ଦ୍ବୀପ ବିଷୟରେ ବହୁତ କମ୍ ସ୍ଥାନୀୟ ଲୋକ ଜାଣିଛନ୍ତି । ତେଣୁ ଏହି ପର୍ଯ୍ୟଟନସ୍ଥଳର ବିକାଶ ପାଇଁ ରାଜ୍ୟ ସରକାର ଯେଉଁ ପଦକ୍ଷେପ ନେଇଛନ୍ତି ତାହାଦ୍ବାରା ଦ୍ବୀପଟିକୁ ବହୁ ପର୍ଯ୍ୟଟକ ଆକର୍ଷିତ ହେବେ ବୋଲି ଆଶା କରାଯାଉଛି ।
