ଖପ୍ରାଖୋଲ: ୨୨/୯(ତାପସ ରଞ୍ଜନ ବେହେରା) ବଲାଙ୍ଗିର ଜିଲ୍ଲା ର ମ୍ୟାଲେରିଆ ପ୍ରବଣ ଅଞ୍ଚଳ ଖପ୍ରାଖୋଲ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରେ ବିଶେଷଜ୍ଞ ଡାକ୍ତର ପଦବୀ ଖାଲି ପଡିଛି। ଏହାକୁ ତୁରନ୍ତ ପୁରଣ ପାଇଁ ସ୍ୱାସ୍ଥ୍ୟ ମନ୍ତ୍ରୀଙ୍କୁ ରାଜ୍ୟ ସଭା ସାଂସଦ ନିରଞ୍ଜନ ବିଶି ଚିଠି ଲେଖିଥିବା ଜଣାଯାଇଛି। କିଛିଦିନ ତଳେ ସାଂସଦ ବିଶି ଖପ୍ରାଖୋଲ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନ କରିଥିବା ବେଳେ ବିଶେଷଜ୍ଞ ଡାକ୍ତର ପଦବୀ ଖାଲିଥିବା ସ୍ଥାନୀୟ ଜନସାଧାରଣ ,ପ୍ରେସ କ୍ଲବ ସଦସ୍ୟ ଜଣାଇଥିଲେ।
ସରକାରୀ ନିୟମ ଅନୁସାରେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରେ ଭେଷଜ ବିଶେଷଜ୍ଞ , ସ୍ତ୍ରୀ ଓ ପ୍ରସୂତି ବିଶେଷଜ୍ଞ, ଶିଶୁ ରୋଗ ବିଶେଷଜ୍ଞ, ଶଲ୍ୟ ବିଶେଷଜ୍ଞ ପ୍ରମୁଖ ନିଯୁକ୍ତ ହେବାକଥା ହେଲେ ବିନା ବିଶେଷଜ୍ଞ ପଦବୀରେ ଚାଲିଛି ସ୍ବାସ୍ଥ୍ୟ କେନ୍ଦ୍ର। ଯାହା ଫଳରେ ଖପ୍ରାଖୋଲ ଅଞ୍ଚଳର ଲୋକେ ନାହିଁ ନ ଥିବା ଅସୁବିଧା ଭୋଗୁଥିବା ବେଳେ ବାଧ୍ୟ ହୋଇ ପାଟଣାଗଡ, ବଲାଙ୍ଗିର, ନୂଆପଡ଼ା, ପଦ୍ମପୁର, ବରଗଡ଼ ପ୍ରମୁଖ ଡାକ୍ତର ଖାନା କୁ ଯିବାକୁ ବାଧ୍ୟ ହେଉଛନ୍ତି।
ଏନେଇ ପୂର୍ବରୁ ପ୍ରଶାସନ କୁ ଜଣାଇଥିଲେ ମଧ୍ୟ କିଛି ଫଳ ମିଳିନି। ସୂଚନା ଯୋଗ୍ୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଏକ ଭେଷଜ ବିଶେଷଜ୍ଞ ନିଯୁକ୍ତ ହୋଇଥିଲେ ବି ତାକୁ ଚାରିମାସ ହେଲା ଡେପୁଟେଶନ ରେ ଟିଟିଲାଗଡ ପଠା ଯାଇଥିବା ଜଣା ଯାଇଛି।
