କଳାହାଣ୍ଡି:(ନରେନ୍ଦ୍ର ନେଗୀ)କଳାହାଣ୍ଡି ଜିଲ୍ଲା ମଦନପୁର ରାମପୁର – ରିଶୀଡା ପୂର୍ତ୍ତ ବିଭାଗ ରାସ୍ତାର ପାଜିବାହାଲି ନିକଟରେ ଏକ ବିରାଟକାୟ ତେନ୍ତୁଳି ଗଛ ଗୁରୁବାର ଅପରାହ୍ନରେ ହଠାତ ଏକ ବାଇକ ଆରୋହୀଙ୍କ ଉପରେ ପଡିଯାଇଥିଲା l ଫଳରେ ଉକ୍ତ ଆରୋହୀ ଜଣକ ଗଛତଳେ ଚାପି ହୋଇ ରହିଯାଇଥିଲେ l ଘଟଣା ସ୍ଥଳରେ ଥିବା ଅନ୍ୟ ପଥଚାରୀମାନେ ଅଗ୍ନିଶମ ବିଭାଗକୁ ଖବର ଦେବାସହ ଉଦ୍ଧାର କାର୍ଯ୍ୟରେ ସହଯୋଗ କରିଥିଲେ l ବାଇକ ଆରୋହୀ ଜଣକକର୍ଲାମୁଣ୍ଡା ବ୍ଲକ୍ ଗଜବାହାଲ ଗ୍ରାମର କେଶବ ସାହୁ ବୋଲି ଜଣା ପଡିଛି l
ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ମ.ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରେ ଭର୍ତ୍ତି କରା ଯାଇଛି। ସୂଚନା ଥାଉ କି, ସେ ଏକ ଲାଲ୍ ରଙ୍ଗର ପ୍ୟାସନ ପ୍ରୋ ଗାଡ଼ିରେ କୌଣସି କାର୍ଯ୍ୟରେ ଏହି ରାସ୍ତାଦେଇ ଯାଉଥିବା ସମୟରେ ଏହି ଅଘଟଣ ଘଟିଥିଲା l ଉଲ୍ଲେଖ ଯୋଗ୍ୟ, ଏହି ରାସ୍ତା ରେ ଅନେକ ବର୍ଷର ପୁରୁଣା ତଥା ବିପଦ ପୂର୍ଣ୍ଣ ଅବସ୍ଥାରେ ଗଛ ସବୁ ରହିଛି l ବିପଦ ସଂକୁଳ ଅବସ୍ଥାରେ ଥିବା ଗଛ ଗୁଡିକୁ ଯଥା ଶୀଘ୍ର ଚିହ୍ନଟ କରି କାଟିଦେବାକୁ ବିଭିନ୍ନ ମହଲରେ ଦାବି ହୋଇଛି l
