ମୁନିଗୁଡ଼ା:(ରମାକାନ୍ତ ପଡ଼ାଲ)ରାୟଗଡ଼ା ଜିଲ୍ଲା ମୁନିଗୁଡ଼ା ସହର ହେଉଛି ଦକ୍ଷିଣ ଓଡ଼ିଶାର ଅନ୍ୟତମ ବ୍ୟସ୍ତବହୁଳ ବ୍ୟବସାୟିକ ପେଣ୍ଠ।ଭୌଗଳିକ ଦୃଷ୍ଟି କୋଣରୁ ଦୁଇ ଦୁଇଟି ରାଜ୍ୟ ରାଜପଥ ମୁନିଗୁଡ଼ା ବାଣିଜ୍ୟିକ ପ୍ରତିଷ୍ଠାନ ଦେଇ ଯାଆଆସ କରିଥାନ୍ତି।ପ୍ରତିଦିନ ହଜାର ହଜାର ଭାରୀଯାନ, ମଧ୍ୟମ ଆକାରର ଯାନ ସହିତ ବିଭିନ୍ନ ଶିଳ୍ପ ସଂସ୍ଥାର ପଣ୍ୟ ବାହି ଯାନ ଦିନରାତି ମୁନିଗୁଡ଼ା ଦେଇ ଯିବା ଆସିବା କରିଥାଏ।ଏହି ଗାଡ଼ି ଗୁଡ଼ିକର ପାର୍କିଂ ପାଇଁ କୌଣସି ବ୍ୟବସ୍ଥା ନଥିବାରୁ ଅନେକ ସମୟରେ ଯାନ ଗୁଡ଼ିକ ରାସ୍ତା ମଧ୍ୟସ୍ଥ ସର୍ବସାଧାରଣ ପାର୍କିଂ ସ୍ଥଳକୁ ଆବୋରି ନେଇଥାନ୍ତି।ଅଧିକାଂଶ ସମୟରେ ଲୋଡ ଗାଡ଼ିକୁ ରାସ୍ତା କଡ଼ରେ ଠିଆ କରିଦେଇ ଗାଡ଼ି ଚାଳକମାନେ ନିତ୍ୟକର୍ମ କରିବାକୁ ଅବା ରାସ୍ତା ପାର୍ଶ୍ବ ହୋଟେଲକୁ ଚାଲି ଯାଉଥିବାରୁ ଉତ୍କଟ ଟ୍ରାଫିକ ସମସ୍ୟା ଉପୁଜୁଛି।
ଏନେଇ ବିଭିନ୍ନ ସମୟରେ ମୁନିଗୁଡ଼ା ବଣିକ ସଂଘ୍,ପ୍ରେସ କ୍ଲବ,ବିକାଶ ପରିଷଦ ଓ ଅନ୍ୟାନ୍ୟ ସାମାଜିକ ଅନୁଷ୍ଠାନ ମୁନିଗୁଡ଼ା ବିଡ଼ିଓ,ତହସିଲଦାର,ଏସିଡିପିଓ ଓ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିବାରୁ କିଛି ଦିନ ପୂର୍ବେ ସହରରେ ନିର୍ଦ୍ଧାରିତ ସମୟ ନୋ ଏଣ୍ଟ୍ରି ସିଷ୍ଟମ କାର୍ଯ୍ୟକାରୀ କରାଯାଇଥିଲା।ପରେ ଏସବୁର ସ୍ଥାୟୀ ସମାଧାନ ନିମନ୍ତେ ମୁନିଗୁଡ଼ା ରାୟଗଡ଼ା ରୋଡରୁ ଜାମରାଗୁଡ଼ା ଯାଏ ବାଇପାସ ରୋଡ ଓ ଗାଡ଼ି ଏବଂ ଚାଳକ ମାନଙ୍କ ସୁରକ୍ଷା,ଟ୍ରାଫିକ ନିୟନ୍ତ୍ରଣ, ସର୍ବୋପରି ମୁନିଗୁଡ଼ା ସହରକୁ ଦୁର୍ଘଟଣା ମୁକ୍ତ ନିମନ୍ତେ ଅତ୍ୟାବଶ୍ୟକ ଟ୍ରକ ଟର୍ମିନାଲ ବ୍ୟବସ୍ଥା କରିବାକୁ ତତ୍କାଳୀନ ଜିଲ୍ଲାପାଳ ଓ ବିଭାଗୀୟ ଅଧିକାରୀଙ୍କୁ ମୁନିଗୁଡ଼ା ବାସୀଙ୍କ ତରଫରୁ ଦାବୀ ଜଣା ଯାଇଥିଲା।ଫଳ ସ୍ୱରୂପ ଏବେ ବାଇପାସ୍ ରୋଡ ହେବାପାଇଁ ସରକାରଙ୍କ ତରଫରୁ ସବୁଜ ସଂକେତ ମିଳିବା ସହିତ ପ୍ରାରମ୍ଭିକ ଅଫିସିଆଲ୍ କାର୍ଯ ଆରମ୍ଭ ହୋଇଥିବା ଶୁଣିବାକୁ ମିଳୁଛି।
ହେଲେ ଗାଡ଼ି ଡ୍ରାଇଭର,ଗାଡ଼ି ମାନଙ୍କ ସୁରକ୍ଷା ଏବଂ ଟ୍ରାଫିକ ସମସ୍ୟା ଦୃଷ୍ଟିରୁ ଅତି ଜରୁରୀ ଆବଶ୍ୟକ ହେଉଥିବା ଟ୍ରକ ଟର୍ମିନାଲ ନିର୍ମାଣ ହେବାର ବିଳମ୍ବକୁ ଦେଖି ଗାଡ଼ି ଡ୍ରାଇଭର ମାନେ ଉଦବେଗ ପ୍ରକାଶ କରିଛନ୍ତି।ସେମାନଙ୍କ କହିବା କଥା ଏହି ବ୍ୟସ୍ତ ବହୁଳ ରାଜ୍ୟ ରାଜପଥ କଡ଼ରେ ସେମାନଙ୍କୁ ଖରା,ବର୍ଷା ଓ ଶୀତରେ ଗାଡ଼ି ରଖି ବିଶ୍ରାମ ନେବାକୁ ପଡୁଛି।ନିଛାଟିଆ ରାସ୍ତା ଥିବା କାରଣରୁ ସେମାନଙ୍କୁ ମୁନିଗୁଡ଼ା ଉପକଣ୍ଠ ଭବାନୀପାଟଣା ପଟୁ ମଶାଣି ସମ୍ମୁଖ ରୋଡ,ବାଲିଗୁଡା ପଟୁ ଭୟରବି ମନ୍ଦିର ସମ୍ମୁଖ,ରାୟଗଡ଼ା ପଟୁ ମୁନିଗୁଡ଼ା ମିନି ଷ୍ଟାଡିୟମ କଡ଼ରେ ଗାଡ଼ି ପାର୍କିଂ କରି ଭୟରେ ରହିବାକୁ ପଡୁଛି।ଯଦି କେବେ ଷ୍ଟ୍ରାଇକ ହେଉଛି ତେବେ ଆହୁରି ଦୟନୀୟ ସମସ୍ୟା ଉପୁଜିଛି।
ସମୟେ ସମୟେ ଗାଡିରୁ ବ୍ୟାଟେରୀ,ଶ୍ଟେପିନ,ଡିଜେଲ ଚୋରି ହୋଇଯାଉଛି।ଅନେକ ସମୟରେ ଅସାମାଜିକ ଲୋକ ମାନଙ୍କ ଦୌରାତ୍ମ୍ୟ ମଧ୍ୟ ସାମନା କରିବାକୁ ପଡୁଥିବା ରାଜ୍ୟ ବାହାର ଡ୍ରାଇଭରମାନେ ଦୁଃଖର ସହିତ କହିଥିଲେ।ରାଜ୍ୟ ସରକାର ଏବେ ବିଭିନ୍ନ ଅଞ୍ଚଳରେ ଟ୍ରକ ଟର୍ମିନାଲ ନିର୍ମାଣ କରିବା ପାଇଁ ଘୋଷଣା କରିଛନ୍ତି।ଏଣୁ ଭୌଗଳିକ,ବ୍ୟବସାୟିକ,ଗମନାଗମନ ଏବଂ ସହରର ଟ୍ରାଫିକ ନିୟନ୍ତ୍ରଣ ଦୃଷ୍ଟିରୁ ମୁନିଗୁଡ଼ା ଉପକଣ୍ଠରେ ଏକ ଟ୍ରକ ଟର୍ମିନାଲ ନିର୍ମାଣ କରିବାକୁ ମୁନିଗୁଡ଼ାର ବିଭିନ୍ନ ମହଲରୁ ଦାବି ଉଠୁଛି।ଏହି ପରିପ୍ରେକ୍ଷୀରେ ମୁନିଗୁଡ଼ା ଗାଡ଼ି ଚାଳକମାନେ ସମସ୍ତ ଗାଡ଼ି ଚାଳକ ମାନଙ୍କ ସୁରକ୍ଷା ଦୃଷ୍ଟିରୁ ଅନ୍ୟ ରାଜ୍ୟ ଏବଂ ଓଡ଼ିଶାର ବିଭିନ୍ନ ଅଞ୍ଚଳରେ ଗାଡ଼ି ଚାଳକ ଓ ଗାଡ଼ି ମାନଙ୍କୁ ମିଳୁଥିବା ଟ୍ରକ ଟର୍ମିନାଲ ସୁବିଧା ସେମାନଙ୍କୁ ଓ ଦୂର ଦୁରାନ୍ତରରୁ ଆସୁଥିବା ଡ୍ରାଇଭର ମାନଙ୍କୁ ଯୋଗାଇଦେବାକୁ ଦାବୀ କରିଛନ୍ତି।
