ବୌଦ୍ଧ:(ଚିତ୍ତରଞ୍ଜନ ସିଂହ)ବୌଦ୍ଧ ଜିଲ୍ଲା ବାଉଁଶୁଣି ପଞ୍ଚାୟତ ଅନ୍ତର୍ଗତ ବଉଦିଆପଡ଼ା ଗ୍ରାମର କୁନି କଳାକାର ଏବଂ ଯୁବ କଳାକାର ମାନଙ୍କ ପ୍ରଚେଷ୍ଟାରେ ବାଲେଶ୍ବର ବାହାନଗା ଟ୍ରେନ୍ ଦୁର୍ଘଟଣାକୁ ନେଇ ଏକ କ୍ଷୁଦ୍ର ଚଳଚ୍ଚିତ୍ର ତିଆରି କରିଛନ୍ତି।ଏହି କ୍ଷୁଦ୍ର ଚଳଚ୍ଚିତ୍ରଟିକୁ ଯୁବ ସାମ୍ୱାଦିକ ସୁମନ୍ତ ମେହେର ରଚନା କରିବା ସହିତ ନିର୍ଦ୍ଦେଶନା ଦେଇଛନ୍ତି। ବାହାନଗା ଟ୍ରେନ୍ ଦୁର୍ଘଟଣାରେ ଶହ ଶହ ଯାତ୍ରୀ ପ୍ରାଣ ହରାଇଛନ୍ତି। ପ୍ରାଣ ହରାଇଥିବା ଯାତ୍ରୀମାନେ ସମସ୍ତେ ନିଜ ନିଜ କର୍ତ୍ତବ୍ୟ ପଥରେ ଯାତ୍ରା କରୁଥିଲେ।କିନ୍ତୁ ବାହାନଗା ଠାରେ ପୂର୍ବରୁ ଜଗି ବସିଥିବା ଯମ ଟାଣି ନେଇଗଲା କେତେ ଲୋକଙ୍କ ଜୀବନ।
ତେବେ ଏହି କ୍ଷୁଦ୍ର ଚଳଚ୍ଚିତ୍ରରେ କେମିତି ଜଣେ ଗରିବ ଶ୍ରେଣୀର ବ୍ୟକ୍ତି ନିଜ ଅଞ୍ଚଳରେ କାମ ନପାଇବା ପରେ ପରିବାର ଚଳାଇବା ପାଇଁ ବାହାର ରାଜ୍ୟକୁ କାମ କରିବା ପାଇଁ ଯାଇଥିଲା ଏବଂ ନିଜ ପିଲାଙ୍କ ପାଇଁ କିଛି ସାମଗ୍ରୀ ଓ ତା ସ୍ତ୍ରୀ ପାଇଁ ଶାଢୀଟିଏ ଆଣି ଖୁସିରେ ଘରକୁ ଫେରିବା ବାଟରେ କରମଣ୍ଡଳ ଟ୍ରେନ୍ ଦୁର୍ଘଟଣାରେ ତାର ଜୀବନ ଚାଲିଗଲା । ଦୁର୍ଘଟଣାରେ ସ୍ବାମୀଙ୍କ ଜୀବନ ଚାଲିଯାଇଥିବା ଖବରପାଇ ତା ସ୍ତ୍ରୀର ଦୁଃଖ କଣ ? ସମସ୍ତ କଥାକୁ ଅଭିନୟ ମାଧ୍ୟମରେ ବଖାଣିଛନ୍ତି କୁନି କୁନି କଳାକାର।ଏହା ସହ ଗୁରୁତର ଯାତ୍ରୀଙ୍କୁ ରକ୍ତର ଆବଶ୍ୟକତା ଥିବା ଜାଣି ଯୁବକ ମାନେ କେମିତି ରକ୍ତଦାନ କରି ଜୀବନ ବଞ୍ଚାଇବା ପାଇଁ ବାହାରି ପଡ଼ିଥିଲେ ଏଭଳି ସମାଜକୁ ବାର୍ତ୍ତା ଦେଲାଭଳି ଦୃଶ୍ୟ ମଧ୍ୟ ଦେଖିବାକୁ ମିଳିଛି ।
ଏହି କ୍ଷୁଦ୍ର ଚଳଚ୍ଚିତ୍ରଟି “ମେହେର୍ ଏଣ୍ଟରଟେନମେଣ୍ଟ” (Meher Entertainment) ୟୁଟ୍ୟୁବ୍ ଚ୍ୟାନେଲରେ ଅପଲୋଡ଼ ହୋଇଥିବା ବେଳେ କମ୍ ସମୟ ମଧ୍ୟରେ ହଜାର ହଜାର ଦର୍ଶକ ଦେଖିଛନ୍ତି। ଏକ ହୃଦୟସ୍ପର୍ଶୀ ଘଟଣାକୁ ଜୀବନ୍ତ ଅଭିନୟ କରିଥିବା କୁନି କଳାକାର ମାନଙ୍କୁ ନିଜ ନିଜ ମତାମତ ଦେଇ ଉତ୍ସାହିତ କରିଛନ୍ତି ଦର୍ଶକ। ଏହି କ୍ଷୁଦ୍ର ଚଳଚ୍ଚିତ୍ରରରେ ମୁଖ୍ୟ ଅଭିନୟ ଥିବା ବାପା-ଶଶାଙ୍କ ଶେଖର ମେହେର, ମାଆ- ଅମିତ୍ ମେହେର ଅଭିନୟ କରିଥିବା ବେଳେ ପୁଅ- ଅଧିବାସ ମେହେର,ସ୍ଵାଧୀନ ମେହେର, ଅମିତ୍ ମେହେର, ରକ୍ତଦାତା- ବାଦଲ ମେହେର, ଶୁଭମ୍ ମେହେର,ବିନୋଦ ମେହେର,ମିଲନ୍ ମେହେର ଅଭିନୟ କରିଥିଲେ ଏବଂ ଏହି କ୍ଷୁଦ୍ର ଚଳଚ୍ଚିତ୍ରଟିକୁ କ୍ୟାମେରାମ୍ୟାନ ଅକୃର ମେହେର ସୁଟିଂ କରିଥିଲେ।
