ଧର୍ମଗଡ଼:(ହେମନ୍ତ କୁମାର ମାଝୀ)କଳାହାଣ୍ଡି ଜିଲ୍ଲା ଧର୍ମଗଡ଼ ବ୍ଲକ ସେମଲା ଗ୍ରାମରେ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ନିମନ୍ତେ ସରକାରଙ୍କ ଦ୍ୱାରା ବସୁଧା ଯୋଜନାରେ ଲକ୍ଷାଧିକ ଟଙ୍କାର ନିର୍ମାଣ ହୋଇଛି ଓଭର ହେଡ ପାଣି ଟାଙ୍କି । ଟାଙ୍କି ନିର୍ମାଣ ପରେ ଆଶା ଥିଲା ଗାଁରେ ବିଶୁଦ୍ଧ ପାନୀୟ ଜଳ ଯୋଗାଣ ହୋଇ ଜଳ କଷ୍ଟ ଦୂର ହେବ । ହେଲେ ଗ୍ରାମବାସୀଙ୍କ ଆଶା ଆଶାରେ ମଉଳି ଗଲା ।କାରଣ ପାନୀୟ ଜଳ ଯୋଗାଣ ଆରମ୍ଭରୁ ଲୋକଙ୍କ କାମରେ ଆସୁ ନାହିଁ ନାମକୁ ମାତ୍ର କେବଲ ପ୍ରାୟ ୧୦ଦିନ ଖଣ୍ଡେ ପାଣି ଛାଡି ଅଚଳ ହୋଇ ପଡିଥିବା ବେଳେ ମୁଡ୍ରାନଦୀ କୂଳରେ ନିର୍ମାଣ ହୋଇଥିବା ଇନ-ଟେକ ପାଣି ଟାଙ୍କି ମଧ୍ୟ ନିମ୍ନ ମାନର କାର୍ଯ୍ୟ ଯୋଗୁ ଦୁର୍ବଳ ହେଉଥିବା ଲୋକେ ଦାବି କରୁଛନ୍ତି ।
ସୂଚନା ଅନୁସାରେ ସେମଲା ଗ୍ରାମରେ ପ୍ରାୟ ୧୫୦୦ରୁ ଉର୍ଦ୍ଧ ଜନ ସଂଖ୍ୟା ରହିଥିବା ବେଳେ ୮ଟି ପଡାକୁ ୭ଟି ନଳକୂପ ରହିଛି ଅଧିକାଂଶ ନଳକୂପ ପାନୀୟ ଜଳ ବ୍ୟବହାର ଅନୁପଯୋଗୀ ବୋଲି ଗ୍ରାମବାସୀ ପ୍ରକାଶ କରିଛନ୍ତି । ଏବେ ଗ୍ରୀଷ୍ମ ପ୍ରବାହରେ ସାରା ଗାଁ ଠୁ ସହର ହୁହୁ ଉତ୍ତାପରେ ଜଳି ଉଠୁଛି ।ଲୋକେ ପାଣି ପାଇଁ ଡହଳ ବିକଳ ହୋଇ ପଡୁଛନ୍ତି ।
ଏନେଇ ପାନୀୟ ଜଳ ସମସ୍ୟା ଦୂର କରିବା ନିମନ୍ତେ ଗ୍ରାମରେ ଥିବା ଓଭର ହେଡ ପାଣି ଟାଙ୍କିକୁ କାର୍ଯ୍ୟକ୍ଷମ କରିବା ପାଇଁ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀଙ୍କୁ ଜଣାଇଲେ ମଧ୍ୟ କିଛି ସୁଫଳ ମିଳୁନଥିବା ଗ୍ରାମବାସୀ କହିଛନ୍ତି ।ଯାହା ଫଳରେ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ତେଣୁ ପ୍ରଶାସନ ଉଚିତ ପଦକ୍ଷେପ ନେଇ ଅଚଳ ହୋଇ ପଡି ରହିଥିବା ଓଭର ହେଡ ପାଣି ଟାଙ୍କି କୁ କାର୍ଯ୍ୟକ୍ଷମ କରାଇ ଶୀଘ୍ର ପାଣି ଯୋଗାଇବା ବ୍ୟବସ୍ଥା କରାଇବା ପାଇଁ ସାଧାରଣରେ ଦାବି ହେଉଛି ।
