ଟିଟିଲାଗଡ଼:(ସଞ୍ଜୟ କୁମାର ନାୟକ)ପବିତ୍ର ରାମନବମୀ ଉପଲକ୍ଷେ ଟିଟିଲାଗଡ଼ ସହରର ସମସ୍ତ ମନ୍ଦିରରେ ଭକ୍ତଙ୍କ ଭିଡ଼ ଜମିଥିଲା। ବିଭିନ୍ନ ମନ୍ଦିରରୁ ଭକ୍ତଙ୍କ ଗହଣରେ ପ୍ରଭୂ ଶ୍ରୀରାମଙ୍କ ଶୋଭାଯାତ୍ରା ବାହାରି ସହର ପରିକ୍ରମା କରିଥିଲା।ସନ୍ଧ୍ୟା ସମୟରେ ରାଧାକୃଷ୍ଣ ମନ୍ଦିର କମିଟି ତଥା ଶ୍ରୀ ରାମ ସେବା ସମିତି ତରଫରୁ ଏକ ବିରାଟ ଶୋଭାଯାତ୍ରା ଶ୍ରୀ ରାମଙ୍କ ଝଣ୍ଡା ଧରି ମାରୱାଡ଼ି ସଂପ୍ରଦାୟର ଆବାଳ, ବୃଦ୍ଧ ବନିତା , ମହିଳା ପୁରୁଷ ନାଚି ନାଚି ପ୍ରଭୁଙ୍କ ଜୟକାର କରିଥିଲେ, ଏହି ଶୋଭାଯାତ୍ରାର ବିଶେଷ ଆକର୍ଷଣ ଥିଲେ କୁନି କୁନି ପିଲାଙ୍କୁ ପ୍ରଭୂ ଶ୍ରୀ ରାମ, ମାତା ସୀତା, ଭ୍ରାତା ଲକ୍ଷ୍ମଣ ଏବଂ ରାମ ଭକ୍ତ ହନୁମାନଙ୍କ ବେଶରେ ଏକ ରଥରେ ସମସ୍ତେ ବିରାଜମାନ ହୋଇଥିଲେ, ଏହା ଦେଖିବାକୁ ଲୋକଙ୍କ ପ୍ରବଳ ଭିଡ଼ ଜମି ଥିଲା।
ସେହିପରି ମୁଡ଼ା ବନ୍ଧ ନିକଟସ୍ଥ ଶିରିଡ଼ି ସାଇ ସଂସ୍ଥାନ ଦ୍ଵାରା ଏକ ବିରାଟ ପାଲିଙ୍କି ଯାତ୍ରା ପ୍ରଭୂ ଶ୍ରୀ ରାମଙ୍କ ଫଟୋ ଏବଂ ଶିରିଡ଼ି ସାଇ ବାବାଙ୍କ ଫଟୋ ସହ ସୁନ୍ଦର ଲାଇଟ ସାଜସଜ୍ଜାରେ ବାହାରି ସହର ପରିକ୍ରମା କରିଥିଲା।ସେହିପରି ପଦ୍ମନାଭପୁର ରାମ ମନ୍ଦିର କମିଟି ପକ୍ଷରୁ ପଡ଼ାର ବହୁତ ପୁରୁଷ ଓ ମହିଳା ମାନଙ୍କ ଦ୍ଵାରା ଏକ ଶୋଭାଯାତ୍ରା ବାହାରି ଥିଲା।
ପବିତ୍ର ରାମନବମୀ ଉପଲକ୍ଷେ ଟିଟିଲାଗଡ଼ ସହର ସମ୍ପୂର୍ଣ୍ଣ ଭାବେ ରାମମୟ ଅର୍ଥାତ୍ ଜୟ ଶ୍ରୀ ରାମ ର ନାରାରେ କମ୍ପି ଉଠିଥିଲା। ଠିକାଦାର ପଡ଼ା ରାଧାକୃଷ୍ଣ ମନ୍ଦିରରେ ୨୪ ଘଣ୍ଟା ଧରି ରାମାୟଣ ପଠନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
ଏକ ଆଧ୍ୟାତ୍ମିକ ପରିବେଶରେ ଆଜି ଦିନଟି ଲୋକଙ୍କ କଟିଛି, ଘରୁ ସମସ୍ତେ ବହାରି ବୁଲିବୁଲି ସମସ୍ତ ହନୁମାନ ମନ୍ଦିର ଏବଂ ଶ୍ରୀ ରାମ ମନ୍ଦିରକୁ ଯାଇ ଦର୍ଶନ ଲାଭ କରିଥିଲେ। ଟିଟିଲାଗଡ଼ ପୋଲିସ ପକ୍ଷରୁ ବ୍ୟାପକ ଫୋର୍ସ ମୁତୟନ ହେବା ଜୋରଦାର ପେଟ୍ରୋଲିଂ କରିବାର ଦେଖିବାକୁ ମିଳିଥିଲା।।
