ଯାଜପୁର ଟାଉନ: ଯାଜପୁର ଦଶରଥପୁର ବ୍ଲକ ଲାଇନ୍ମ୍ୟାନ ସଂଘ ଆହ୍ୱାନକ୍ରମେ ଟାଟା ପାୱାର ଦ୍ୱାରା ପାଳିତ ଜାତୀୟ ଲାଇନ୍ମ୍ୟାନ ଦିବସକୁ ଯାଜପୁର ପାୱର ଏମ୍ପ୍ଲଇଜ୍ ୟୁନିୟନ୍ ବିରୋଧ କରିବା ସହିତ ଏହି ଦିବସ ପାଳନକୁ ବର୍ଜ୍ଜନ କରିଛି ।
ଟାଟା ପାୱାର ପକ୍ଷରୁ ଜାତୀୟ ଲାଇନ୍ ମ୍ୟାନ ଦିବସ ପାଳନ ପାଇଁ ବିରଜା ମନ୍ଦିର ସନ୍ନିକଟ ବିରଜା କଲ୍ୟାଣ ମଣ୍ଡପ ପରିସରରେ ଭବ୍ୟ ଆୟୋଜନ ହୋଇଥିବା ବେଳେ ଏହି କାର୍ଯ୍ୟକ୍ରମରେ ଦଶରଥପୁର ବିଦ୍ୟୁତ ଉପଖଣ୍ଡ ଅଧିନର ନିଲମ୍ବିତ ଲାଇନ୍ମ୍ୟାନ ପ୍ରଶାନ୍ତ ନାୟକଙ୍କ ପୁନଃ ନିଯୁକ୍ତି ଦାବିରେ ଲାଇନ୍ମ୍ୟାନ ସଂଘ ଏହି କାର୍ଯ୍ୟକ୍ରମକୁ ସମ୍ପୂର୍ଣ୍ଣ ବର୍ଜନ କରିବା ସହିତ ସଂଘର ସମସ୍ତ କାର୍ଯ୍ୟକର୍ତ୍ତା ଓ ସଭ୍ୟ ଡିଭିଜନାଲ ସମ୍ପାଦକ ଶ୍ରୀକାନ୍ତ କୁମାର ବେହୁରିଆ, ଅଭୟ କୁମାର ପଣ୍ଡା,ଙ୍କ ନେତୃତ୍ୱରେ ଯାଜପୁର ଡିଭିଜନର କାର୍ଯ୍ୟନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ପ୍ରଶାନ୍ତ ନାୟକଙ୍କ ପୁନଃ ନିଯୁକ୍ତି ଦିଆନଯାଇଛି ସେତେଦିନ ପର୍ଯ୍ୟନ୍ତ ଆମ ସଂଘ ପକ୍ଷରୁ ଅସହଯୋଗ ଜାରି ରହିବ ।
ଏଭଳି କିଛି କହି ଜାତୀୟ ଲାଇନ୍ମ୍ୟାନ ଦିବସକୁ ବର୍ଜନ କରିଥିଲେ ଯାଜପୁର ପାୱାର ଏମ୍ପ୍ଲଇଜ୍ ୟୁନିୟନ୍ର ସମସ୍ତ ସଭ୍ୟ ଓ କାର୍ଯ୍ୟକର୍ତ୍ତା । ବିରଜା କଲ୍ୟାଣ ମଣ୍ଡପରେ ଏହି ଦିବସ ପାଳନ ପାଇଁ ଟାଟା ପାୱାର ପକ୍ଷରୁ ବିରାଟା କାର୍ଯ୍ୟକ୍ରମ ଆୟୋଜନ କରାଯାଇଥିଲା । ମାତ୍ର ଏହି କାର୍ଯ୍ୟକ୍ରମରେ କିଛି ହାତ ଗଣତି ଉପରିସ୍ଥ ଅଧିକାରୀ ଲାଇନ୍ମ୍ୟାନ ମାନଙ୍କ ଆଗମନକୁ ଅପେକ୍ଷା କରି ରହିଥିଲେ ମଧ୍ୟ ଜଣେ ହେଲେ ଲାଇନ୍ ମ୍ୟାନ ଏହି କାର୍ଯ୍ୟକ୍ରମରେ ଯୋଗ ଦେଇନଥିଲେ । ଯାଦ୍ୱାରା ଯାଜପୁର ଟାଉନ ଡିଭିଜନ ପକ୍ଷରୁ ଅନୁଷ୍ଠିତ ଲାଇନ୍ମ୍ୟାନ ଦିବସ କାର୍ଯ୍ୟକ୍ରମ ସମ୍ପୂର୍ଣ୍ଣ ଭଣ୍ଡୁର ହୋଇଥିବା ଜଣାଯାଇଛି ।
