ସମ୍ବଲପୁର: (ରମାକାନ୍ତ ବିଶ୍ବାଳ) କୀଟନାଶକ ଜନିତ ଆତ୍ମହତ୍ୟା ସମଗ୍ର ବିଶ୍ବରେ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଏଥିରେ ପ୍ରତିବର୍ଷ ଲକ୍ଷାଧିକ ଲୋକଙ୍କ ପ୍ରାଣହାନି ଘଟୁଥିବା ବେଳେ ଅଧିକାଂଶ ଚାଷୀ ରହୁଥିବାରୁ ବୁଦ୍ଧିଜୀବୀଙ୍କ ପାଇଁ ଚିନ୍ତାର କାରଣ ହୋଇଛି। ଏହି ସମସ୍ୟା ଉପରେ ଗୌତମ ମିଶ୍ରଙ୍କ ଫିଲ୍ମ ‘ଦ ଡିଭାଇନ୍ ଡକ୍ଟର’ ଆଧାରିତ। ଏହି ଫିଲ୍ମଟି ଇତି ମଧ୍ୟରେ ଅନେକ ରାଜ୍ୟସ୍ତରୀୟ, ଜାତୀୟ ଏବଂ ଆନ୍ତର୍ଜାତିକ ସ୍ତରରେ ପ୍ରଦର୍ଶିତ ହେବା ସହ ଉଚ୍ଚ ପ୍ରଶଂସିତ ହୋଇଛି। ଏହାକୁ ୟୁନିଭର୍ସିଟି ଅଫ୍ ଏଡିନବର୍ଗର କ୍ଲିନିକାଲ୍ ଟକ୍ସିକୋଲୋଜି ବିଭାଗର ପ୍ରଫେସର ମାଇକେଲ୍ ଏଡିଲଷ୍ଟନ୍ ଉଚ୍ଚ ପ୍ରଶଂସା କରିଛନ୍ତି। ପ୍ରଫେସର ଏଡିଲଷ୍ଟନ କହିଛନ୍ତି ଯେ ସେ ଦୀର୍ଘ ୨୫ ବର୍ଷ ଧରି ଦକ୍ଷିଣ ଏସିଆରେ କୀଟନାଶକ ବିଷକ୍ରିୟା ପ୍ରସଙ୍ଗରେ ଅଧ୍ୟୟନ କରିଛନ୍ତି।
ନିକଟରେ ସେ ‘ଦ ଡିଭାଇନ୍ ଡକ୍ଟର’ ଫିଲ୍ମଟି ଦେଖିବା ପରେ ଏହାର ଗୁରୁତ୍ବ ଉପଲବ୍ଧି କରିପାରିଛନ୍ତି। ପାରାକ୍ବେଟ୍ ଭଳି କୀଟନାଶକ ୧୯୭୦ ମସିହାରୁ ସମଗ୍ର ବିଶ୍ବରେ ଜୀବନନାଶକ ଭାବେ ସମସ୍ୟା ସୃଷ୍ଟି କରିଛି। କେବଳ ଚୀନରେ ଏହା ସହସ୍ରାଧିକ ଚାଷୀଙ୍କ ପ୍ରାଣହାନିର କାରଣ ସାଜିଛି। ଏହି କୀଟନାଶକ ଏଭଳି ଭୟଙ୍କର ଯେ ଏହାକୁ କ୍ଷୁଦ୍ର ଉଦ୍ୟୋଗ ତଥା ଛୋଟଛୋଟ ଚାଷୀଙ୍କ ପକ୍ଷରେ ବ୍ୟବହାର ସୁରକ୍ଷିତ ନୁହେଁ। ଏହାକୁ ଦୃଷ୍ଟିରେ ରଖି ବିଶ୍ବର ୬୭ ଦେଶରେ ଏହାକୁ ନିଷିଦ୍ଧ କରାଯାଇଛି। ଗୌତମ ମିଶ୍ରଙ୍କ ଫିଲ୍ମଟି ପୂର୍ବ ଭାରତର ଓଡିଶା ରାଜ୍ୟର ସମସ୍ୟା ଉପରେ ଆଧାରିତ। ଗତ ୫ ବର୍ଷ ମଧ୍ୟରେ ପାରାକ୍ବେଟ୍ ଜନିତ ମୃତ୍ୟୁ ସଂଖ୍ୟା ଆଶାତୀତ ଭାବେ ବୃଦ୍ଧି ଘଟିଛି। ଯାହାକୁ ନେଇ ଏଥିରେ ଡାକ୍ତରଙ୍କ ଉଦ୍ବେଗ ବିଷୟ ଉପସ୍ଥାପିତ ହୋଇଛି। ଚାଷୀ ଆତ୍ମହତ୍ୟା ଭଳି ଉଦବେଗଜନକ ପ୍ରସଙ୍ଗକୁ ଲୋକଲୋଚନକୁ ଆଣିବାରେ ଶ୍ରୀ ମିଶ୍ରଙ୍କ ‘ଦ ଡିଭାଇନ ଡକ୍ଟର’ ପ୍ରଶଂସନୀୟ ଉଦ୍ୟମ ବୋଲି ଏଡିଲଷ୍ଟନ୍ ପ୍ରକାଶ କରିଛନ୍ତି।
