ବୌଦ୍ଧ:(ଚିତ୍ତରଞ୍ଜନ ସିଂ) ଆଜିକାଲି ହାତରେ ଟଙ୍କା ଥିଲେ ମଧ୍ୟ ଶ୍ରମିକ ଙ୍କ ଅଭାବ ତଥା ଠକାମି ପାଇଁ ଘରଟିଏ ନିର୍ମାଣ କରିବା ଲୋକଙ୍କ ପକ୍ଷେ ମୁଣ୍ଡବ୍ୟଥା ର କାରଣ ପାଲଟିଛି।ସେହିପରି ଘରଟିଏ ନିର୍ମାଣ କରିବାରେ ବହୁ ଆନୁଷଙ୍ଗିକ ଜିନିଷ ର ଆବଶ୍ୟକତା ରହିଥିବାବେଳେ ଶ୍ରମିକଙ୍କ ମଜୁରୀରେ ସବୁଠୁ ଅଧିକ ଖର୍ଚ ହେଉଛି।ସାଧାରଣ ଲୋକଙ୍କ ପାଇଁ ଏହା କଷ୍ଟକର ଓ କାଠିକର ପାଠ ସଦୃଶ୍ୟ। କିନ୍ତୁ ବୁଦ୍ଧି ଥିଲେ ବଳ ଆସେ ଓ ଇଛା ଶକ୍ତି ଥିଲେ ଅସାଧ୍ୟ କାମ ସହଜରେ ସାଧ୍ୟ ହୋଇପାରେ।
ଏପରି ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ବୌଦ୍ଧ ଜିଲ୍ଲା କଣ୍ଟାମାଲ ବ୍ଲକ ଶୁଣ୍ଢିପଦର ପଂଚାୟତ ସଦର ମହକୁମାରେ।ଉକ୍ତ ଗ୍ରାମର ପୂର୍ଣ୍ଣଚନ୍ଦ୍ର ସେଠି ବହୁ କଷ୍ଟରେ ଅର୍ଥାଯୋଗାଡ଼ କରି ଘର ଖଣ୍ଡିଏ ନିର୍ମାଣ କରୁଛନ୍ତି। ଘର ନିର୍ମାଣ ରେ ନିଜ ଦ୍ୱାରା ଯାହା ହୋଇପାରିବ କରୁଛନ୍ତି ଏବଂ ଆବଶ୍ୟକ ହେଲେ ଶ୍ରମିକ ଓ ମିସ୍ତ୍ରୀ ଲଗାଉଛନ୍ତି।ଏହିପରି ଭାବରେ ସେ ଛାତ ପକାଇ ଏକ ଘର ନିର୍ମାଣ କରିସାରିଛନ୍ତି।ଛାତ ଉପର କାମ କରିବାକୁ ଉପରକୁ ବାଲି, ସିମେଣ୍ଟ, ଚିପ୍ସ ଓ ପାଣି ନେବାକୁ ପଡୁଛି।
ଏଥିପାଇଁ ସି ଡି ସହ ଅଧିକ ଶ୍ରମିକ କିମ୍ବା ଆଧୁନିକ ମେସିନ ଦରକାର।ସେ ସବୁ ଜିନିଷ ଯୋଗାଡ଼ କରିବା ଓ ଖର୍ଚ୍ଚ ତୁଲାଇବା ବଦଳରେ ପୂର୍ଣ୍ଣଚନ୍ଦ୍ର ସେଠି ନିଜ ବୁଦ୍ଧି ପ୍ରୟୋଗ କରି ଦୁଇଟି ବଡ଼ ଗଛ(କାଠ କନା),ଦୁଇଟି ଟାୟାର ଓ ଗୋଟିଏ ଦଉଡି ବଳ ରେ ଏକ ଦେଶୀ ” ତେଣ୍ଡା” କରି ସେ ଉକ୍ତ ବାଲି, ସିମେଣ୍ଟ , ଚିପ୍ସ ଓ ପାଣି କୁ ଛାତ ଉପରକୁ ନେଉଥିବା ସାମାଜିକ ଗଣମାଧ୍ୟମରେ ଭାଇରଲ ହେଉଛି।ଏହି କାମରେ ଛାତ ଉପରେ ରହି ନିଜ ପରିବାର ର ଜଣେ ସଦସ୍ୟ ତାଙ୍କୁ ସାହାଯ୍ୟ କରୁଛନ୍ତି।ଏହାଦ୍ୱାରା ତାଙ୍କ ଅନେକ ଟଙ୍କା ଖର୍ଚ ରୁ ବଂଚି ଯାଇଛି।ତେବେ ତାଙ୍କ ଏହି ଅଭିନବ ବୁଦ୍ଧି କୌଶଳ କୁ ଅନେକ ଲୋକ ଭୁୟସୀ ପ୍ରଶଂସା କରିଛନ୍ତି।
