ଭୁବନେଶ୍ୱର: ଲୋକଙ୍କ ପାଖକୁ ଯାଇ ସେମାନଙ୍କ ସୁଖଦୁଃଖରେ ଜଡିତ ହେବାକୁ ଏବଂ ଭଦ୍ର,ନମ୍ର ଓ ସରଳ ଜୀବନଯାପନ କରିବାକୁ ବିଜୁ ଜନତା ଦଳ ସୁପ୍ରିମୋ ନବୀନ ପଟ୍ଟନାୟକ ଦଳର ନବ ନିର୍ବାଚିତ ବିଧାୟକମାନଙ୍କୁ ଗୁରୁମନ୍ତ୍ର ଦେଇଛନ୍ତି।ପୂର୍ବାହ୍ନ ୧୦ଟାରେ ଆରମ୍ଭ ହୋଇଥିବା ଏହି ବୈଠକ ପ୍ରାୟ ଦେଢ଼ ଘଣ୍ଟା ଧରି ଚାଲିଥିଲା। ଜଣେ ବିଧାୟକ କେବଳ ଦଳୀୟ କର୍ମୀ ବା ନିର୍ଦ୍ଦିଷ୍ଟ ଦଳର ନୁହନ୍ତି, ସେ ସବୁ ଦଳର। ନିର୍ବାଚନମଣ୍ଡଳୀର ସମସ୍ତ ଲୋକଙ୍କ ବିଶ୍ୱାସକୁ ନେଇ ସରକାରୀ ଯୋଜନାର ସୁଫଳ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚାଇବାକୁ ସେ କହିଛନ୍ତି। ଗର୍ବ ଓ ଅହଂକାରଠାରୁ ବିଧାୟକମାନେ ନିଜକୁ ଦୂରରେ ରଖନ୍ତୁ। ସେହିପରି ଦାମୀ ଗାଡ଼ି ନ ଚଢ଼ି ଅପେକ୍ଷାକୃତ କମ୍ ଦାମର ଗାଡ଼ି ଚଢ଼ିବାପାଇଁ ମଧ୍ୟ ତାଙ୍କୁ ପରାମର୍ଶ ଦେଇଛନ୍ତି। ପ୍ରାୟ ୪୦ରୁ ୫୦ଜଣ ବିଧାୟକ ଏହି ବୈଠକରେ ଯୋଗ ଦେଇଥିଲେ।
ଗତ ମେ ୨୯ ତାରିଖ ଦିନ ନବୀନଙ୍କ ନୂଆ ମନ୍ତ୍ରିମଣ୍ଡଳ ଶପଥ ନେବା ପରେପରେ ନବଗଠିତ ମନ୍ତ୍ରୀ ପରିଷଦର ପ୍ରଥମ ବୈଠକରେ ଦଳର ସମସ୍ତ ନିର୍ବାଚନୀ ପ୍ରତିଶ୍ରୁତି ପୂରଣ ପାଇଁ ନିଷ୍ପତ୍ତି ହୋଇଥିିଲା। ନବୀନ ମଧ୍ୟ ମନ୍ତ୍ରୀମାନଙ୍କୁ ଲୋକଙ୍କ ସମସ୍ୟା ସମାଧାନ ଉପରେ ପ୍ରାଥମିକତା ଦେଇଥିଲେ। ଆସନ୍ତା ୭ ତାରିଖ ଦିନ ମନ୍ତ୍ରୀମାନଙ୍କୁ କାର୍ଯ୍ୟବଳିର ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି। ମୁଖ୍ୟମନ୍ତ୍ରୀ କିଛି ଦିନ ଆଗରୁ ମଧ୍ୟ ରାଜ୍ୟର ବରିଷ୍ଠ ଅଧିକାରୀମାନଙ୍କୁ ଉଦ୍ବୋଧନ ନେଇ ତାଙ୍କର ୫ଟି ମନ୍ତ୍ର (ଟିମ୍ଓ୍ଵାର୍କ,ଟ୍ରାନ୍ସପାରେନ୍ସି,ଟେକ୍ନୋଲୋଜି,ଟ୍ରାନ୍ସଫର୍ମେସନ ଓ ଟାଇମ୍) ର ସଫଳ ପାଳନ ଉପରେ ଗୁରୁତ୍ୱ ଆରୋପ କରିଥିଲେ।
