ଧର୍ମଶାଳା ଥାନା ଅଞ୍ଚଳରେ ମା ଓ ପୁଅକୁ ହତ୍ୟା କରିବା ସହିତ ଝିଅକୁ ଅତ୍ୟାଚାର କରି ପାହାଡ଼ରେ ଫିଙ୍ଗି ଦେବା ଘଟଣାର ମୁଖ୍ୟ ଅଭିଯୁକ୍ତ ବିଜୟ ବେହେରାକୁ ପୁଲିସ ଦକ୍ଷିଣ ଭାରତରୁ ଗିରଫ କରିଛି। ବିଜୟର ଜଣେ ସହଯୋଗୀ ପୂର୍ବରୁ ଗିରଫ ହୋଇଥିବା ବେଳେ ଅନ୍ୟ ଜଣେ ସହଯୋଗୀକୁ ପୁଲିସ ଆଜି ଉଠାଇ ନେଇଛି। ବାତ୍ୟା ‘ଫନି’ ର ପୂର୍ବ ଦିନ ୨ତାରିଖ ରାତିରେ ଦେଉଳି ଗାଁ’ର ଅବସରପ୍ରାପ୍ତ କର୍ମଚାରୀ କୃଷ୍ଣ ସାମଲଙ୍କ ଦ୍ବିତୀୟ ପତ୍ନୀ ମିତା ସାମଲ ଓ ତାଙ୍କ କଲେଜ ପଢୁଆ ଝିଅକୁ ଫେରାର ମୁଖ୍ୟ ଅଭିଯୁକ୍ତ ବିଜୟ, ଗିରଫ ହୋଇଥିବା ଭିକି ଓ ଅନ୍ୟ ସହଯୋଗୀ ନିକଟ ଦେଉଳି ପାହାଡ଼ ଉପର ଗୁମ୍ଫାକୁ ଟେକି ନେଇ ରାତି ସାରା ନିର୍ଯ୍ୟାତନା ଦେଲେ। ୪ ତାରିଖ ଦିନ କେତେକ ଲୋକେ ପାହାଡ଼ ଉପରକୁ ଯାଇଥିବା ବେଳେ ମିତାଙ୍କ ମରଶରୀର ଓ ସଂଜ୍ଞାହୀନ ଅବସ୍ଥାରେ ଝିଅ ପଡ଼ିଥିବାର ଦେଖି ପୁଲିସକୁ ଖବର ଦେଇଥିଲେ।
ଗିରଫ ହୋଇଥିବା ମୁଖ୍ୟ ଅଭିଯୁକ୍ତ ନାଁ ବିଜୟ କୁମାର ବେହେରା। ତା’ର ଘର ଦେଉଳି ଗାଁରେ। ଗତ ମାସରେ ଅଭିଯୁକ୍ତ ବିଜୟ ଏହି କାଣ୍ଡ ଘଟାଇ ଫେରାର ହୋଇଯାଇଥିଲା।ସୂଚନା ଅନୁସାରେ, ଗତ ୨ ତାରିଖରେ ଦେଉଳି ଗ୍ରାମର ଜଣେ ନାବାଳିକାକୁ ମୁଖ୍ୟ ଅଭିଯୁକ୍ତ ଓ ତାର ସହଯୋଗୀ ରାତିରେ ଡାକି ନେଇଥିଲେ। ଏହାକୁ ନାବାଳିକାର ମା’ ବିରୋଧ କରିବା ସହ ସେମାନଙ୍କ ପିଛା କରିଥିଲେ। ହେଲେ ଉଭୟ ମା’ ଓ ଝିଅ ରାତିରେ ଘରକୁ ଫେରିନଥିଲେ। ମେ’ ୪ ତାରିଖ ସକାଳେ ଦେଉଳି ପାହାଡରେ ମହିଳାଙ୍କ ମୃତଦେହ ସହ ତାଙ୍କ ଝିଅକୁ ଅଚେତ ଅବସ୍ଥାରେ ପଡିଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଚିକିତ୍ସିତ ହେଉଥିବା ସମୟରେ ପୁଲିସ ପୀଡ଼ିତାଙ୍କ ବୟାନକୁ ରେକର୍ଡ କରିଥିଲା।ପୂର୍ବରୁ ଏହି ଘଟଣାରେ ଅଭିଯୁକ୍ତ ବିଜୟର ଜଣେ ସହଯୋଗୀକୁ ପୁଲିସ ଗିରଫ କରିଥିଲା। ତାଙ୍କ ବୟାନ ଆଧାରରେ ମୁଖ୍ୟ ଅଭିଯୁକ୍ତକୁ ଗିରଫ କରାଯାଇଛି।
