ଯାଜପୁର ରେ ଛୋଟ ଛୋଟ ଦଳ ପକ୍ଷରୁ ସମାଜକୁ ସ୍ୱତନ୍ତ୍ର ବାର୍ତା ପ୍ରଚାର ।

Posted on April 26, 2019 at 1:03 am by Aei Odisha

2406 263

ଯାଜପୁର:(ଆନନ୍ଦ ଚନ୍ଦ୍ର ସାହୁ)ଚାଲିଛି ଗଣତନ୍ତ୍ରର ମହାପର୍ବ ସାଧାରଣ ନିର୍ବାଚନ । ଏହା ଏମିତି ଏକ ପର୍ବ ଯେଉଁଥିରେ ପ୍ରତ୍ୟେକ ନାଗରିକ ହୋଇଥାନ୍ତି ସାମିଲ । ବର୍ତମାନ ସାଧାରଣ ନିର୍ବାଚନ ସଂପୁର୍ଣ୍ଣ ବ୍ୟୟବହୁଳ ହୋଇଥିବା ବେଳେ ଆମ ସମ୍ବିଧାନ ସମସ୍ତଙ୍କୁ ସମାନ ଅଧିକାର ଦେଇଛି । ସମସ୍ତେ ଏହି ନିର୍ବାଚନରେ ଅଂଶଗ୍ରହଣ କରିବାର ସୁଯୋଗ ରହିଛି । ବଡ ବଡ ଦଳକୁ ବାଦ ଦେଇ ଅନେକ ଛୋଟ ଛୋଟ ଦଳ ଚଳିତ ନିର୍ବାଚନରେ ଅଂଶଗ୍ରହଣ କରିଛନ୍ତି । ଯାଜପୁର ଜିଲାରେ ଛୋଟ ଛୋଟ ରାଜନୈତିକ ଦଳ ପକ୍ଷରୁ ଉଭୟ ବିଧାନସଭା ଓ ଲୋକସଭା ଆସନ ପାଇଁ ପ୍ରାର୍ଥୀ ଦେଇ ସମାଜକୁ ସ୍ୱତନ୍ତ୍ର ବାର୍ତା ପ୍ରଚାର କରୁଛନ୍ତି ।

ସେହିପରି ଅନେକ ଶିକ୍ଷିତ ଯୁବକ ମଧ୍ୟ ସ୍ୱାଧିନ ଭାବେ ନିଜର ନାମାଙ୍କନ ପତ୍ର ଦାଖଲ କରି ଭୋଟ ଭିକ୍ଷା କରୁଛନ୍ତି ଚାରିଆଡେ ଏବେ ନିର୍ବାଚନର ହାୱା । ବ୍ୟାନର,ପୋଷ୍ଟର ଓ ପ୍ରଚାରରେ କଂପୁଛି ଗାଁ ଠୁ ସହର । ବିଜେଡି,ବିଜେପି ଓ କଂଗ୍ରେସ ଭଳି ପ୍ରମୁଖ ଦଳ ମାନଙ୍କର ନିର୍ବାଚନୀ ପ୍ରଚାରରେ କଂପୁଛି ସମଗ୍ର ଅଂଚଳ । କିଏ ବଡ ବଡ ରାଜନେତାଙ୍କୁ ଆଣି ପ୍ରଚାର ଚଳାଇଛି ତ ଆଉ କିଏ ସିନେ ତାରକାଙ୍କୁ ନିଜ ଦଳୀୟ ପ୍ରଚାରରେ ନିୟୋଜିତ କରୁଛି । ଏ ସବୁ ଭିତରେ ଅନେକ ଛୋଟ ଛୋଟ ରାଜନୈତିକ ଦଳ ମଧ୍ୟ ସେମାନଙ୍କ ପ୍ରଚାରରୁ ବାଦ ପଡିନାହାଁନ୍ତି । ଯାଜପୁର ଜିଲାରେ ପ୍ରାଉଟିଷ୍ଟ ବ୍ଲକ ଅପଂ ଇଣ୍ଡିଆ,କଳିଙ୍ଗସେନା ଭଳି ଅନେକ ଦଳ ନିଜ ନିଜ ଅନ୍ଦାଜରେ ଲୋକଙ୍କୁ ପ୍ରଭାବିତ କରି ନିଜ ଦଳ ଓ ପ୍ରାର୍ଥୀଙ୍କ ପାଇଁ ଭୋଟ ଭିକ୍ଷା କରୁଛନ୍ତି । ପ୍ରମୁଖ ଦଳ ମାନଙ୍କ ଠାରୁ କିଛି ସ୍ୱତନ୍ତ୍ର ଚିନ୍ତାଧାରା ନେଇ ନିର୍ବାଚନ ମଇଦାନକୁ ଓହ୍ଲାଇଛନ୍ତି ଏମାନେ । ଏହି ଛୋଟ ଛୋଟ ଦଳ ମାନଙ୍କ ସମର୍ଥନ ଦେଉଛନ୍ତି ଅନେକ ସ୍ୱେଚ୍ଛାସେବୀ ଓ ବୁଦ୍ଧିଜିବି ।
ଯାଜପୁର ଜିଲାରେ ଛୋଟ ଛୋଟ ଦଳ ଙ୍କ ଭଳି ଅନେକ ଉଚ୍ଚ ଶିକ୍ଷିତ ବ୍ୟକ୍ତି ମଧ୍ୟ ନିର୍ବାଚନ ମଇଦାନକୁ ଓହ୍ଲାଇଛନ୍ତି । ଇଂ ବିଶ୍ୱଜିତ୍ ମହାନ୍ତି । ବିଶ୍ୱଜିତ୍ ଙ୍କ ଜେଜେ ବାପା ପରମାନନ୍ଦ ମହାନ୍ତି ଧର୍ମଶାଳାର ପୂର୍ବତନ ବିଧାୟକ ଥିଲେ । ଜେଜେ ବାପାଙ୍କ ଆଦର୍ଶରେ ଅନୁପ୍ରାଣିତ ହୋଇ ବିଶ୍ୱଜିତ ସମାଜସେବା ସହିତ ଅନେକ ସାମାଜିକ ସଂଗଠନରେ ସାମିଲ ଥିଲେ । କିନ୍ତୁ ଚଳିତ ଥର କୋରେଇ ବିଧାନସଭା ଆସନରୁ ସ୍ୱାଧିନ ପ୍ରାର୍ଥୀ ଭାବେ ନିର୍ବାଚନ ଲଢ଼ୁଛନ୍ତି । ଆଖି ଆଗରେ ରହିଛି ଅନେକ ଆଶା ଓ ସ୍ୱପ୍ନ । ସେହିଭଳି ଆଉ ଜଣେ ଯୁବକ ହେଲେ ଭିମସେନ ବେହେରା । ପେଶାରେ ଜଣେ ହୋମିଓପାଥିକ ଡାକ୍ତର । ଚଳିତ ବର୍ଷ ସେ ସ୍ୱାଧିନ ପ୍ରାର୍ଥୀ ଭାବେ ଲୋକସଭା ଆସନରୁ ପ୍ରାର୍ଥୀ ହୋଇଛନ୍ତି । ପୂର୍ବରୁ ମଧ୍ୟ ସେ ଏକାଧିକ ବାର ସ୍ୱାଧିନ ପ୍ରାର୍ଥୀ ଭାବେ ନିଜର ନାମାଙ୍କନ ପତ୍ର ଦାଖଲ କରିଥିଲେ । ନିର୍ବାଚନ ଲଢ଼ିବା ପାଇଁ ପାଖରେ ପର୍ଯ୍ୟାପ୍ତ ଅର୍ଥ ନଥିଲେ ବି ଦେଶ ତଥା ରାଜ୍ୟ ପାଇଁ ଅନେକ ସ୍ୱପ୍ନ ଦେଖିଛନ୍ତି ।
ଭାରତୀୟ ଗଣତନ୍ତ୍ର ତାର ସ୍ୱତନ୍ତ୍ରତା ପାଇଁ ପୁରା ବିଶ୍ୱରେ ପରିଚୟ ସୃଷ୍ଟି କରିପାରିଛି ।