କୋଣାର୍କ ଝୋଟକଳ ଖୋଲିବା ଦାବିରେ ବିକ୍ଷୋଭ

ଯାଜପୁର :୨୦୧୨ ମସିହାରୁ ବନ୍ଦ୍ ହୋଇ ପଡି ରହିଥିବା କୋଣାର୍କ ଝୋଟକଳକୁ ପୁଣି ଚାଲୁ କରିବା ପାଇଁ ଏକଜୁଟ୍ ହୋଇଛନ୍ତି ପୁରୁଣା ଶ୍ରମିକ ଓ ସେମାନଙ୍କ ପରିବାରର ସଦସ୍ୟ । ଦିନେ ହଜାର ହଜାର ଲୋକଙ୍କ ମୁହଁରେ ହସ ଫୁଟାଉଥିବା ଏହି କାରଖାନା ବନ୍ଦ ହେବା ଯୋଗୁଁ ଚାକିରି ହରାଇଥିବା ଶ୍ରମିକଙ୍କ ଜୀବନ ଦୁର୍ବିସହ ହୋଇପଡିଛି । ୧୯୭୪ ମସିହାରେ ନନ୍ଦିନୀ ଶତପଥିଙ୍କ ମୁଖ୍ୟମନ୍ତ୍ରୀତ୍ୱ ସମୟରେ ପ୍ରତିଷ୍ଠା ହୋଇଥିଲା ରାଜ୍ୟର ଏହି ପ୍ରଥମ କୃଷିଭିତ୍ତିକ ଶିଳ୍ପ କୋଣାର୍କ ଝୋଟକଳ । ଆଇଡିସି ଓ ନାଫେଡ ସହାୟତାରେ ୬ କୋଟି ଟଙ୍କା ବ୍ୟୟରେ ନିର୍ମିତ ହୋଇଥିବା ଏହି କାରଖାନାରେ ୩ହଜାର କର୍ମଚାରୀ କାମକରି ପରିବାର ପୋଷଣ କରୁଥିଲେ । ହେଲେ ବିଭିନ୍ନ ସମୟରେ ଶ୍ରମିକ ସଙ୍ଗଠନ ଓ ରାଜନୈତିକ ଦଳଙ୍କ ଲଢେଇ ଭିତରେ ଏହି ସ୍ୱନାମଧନ୍ୟ କାରଖାନା ଏବେ ମୃତବତ୍ ପଡିରହିଛି । ୨୦୧୨ ମସିହାରୁ ଏହି କାରଖାନ ବନ୍ଦ ହେବା ସହ ଘରୋଇ କମ୍ପାନୀ ଓଡିଶା ଷ୍ଟିଭେଡର୍ସ ଲିମିଟେଡ ହାତରେ ରହିଛି ।ଏହି କାରଖାନା ବନ୍ଦ ହେବା ଯୋଗୁଁ ଚାକିରି ହରାଇଥିବା ଶ୍ରମିକଙ୍କ ଜୀବନ ଦୁର୍ବିସହ ହୋଇପଡିଛି । ତେଣୁ ଏଥିରେ ମୁଖ୍ୟମନ୍ତ୍ରୀ ହସ୍ତକ୍ଷେପ କରି କାରଖାନାକୁ ପୁଣି ଚାଲୁ କରିବାକୁ ଦାବି କରିଛନ୍ତି ।