ଯାଜପୁର ଜିଲା ବିଂଝାରପୁରରେ ବରୁଣେଶ୍ୱର ମହୋତ୍ସବ ଆୟୋଜନକୁ ନେଇ ଦେଖାଦେଇଛି ବିିବାଦ । ଦୀର୍ଘବର୍ଷ ଧରି ଏହି ମହୋତ୍ସବକୁ ଅରେଇ ପଂଚାୟତ ଆୟୋଜନ କରି ଆସୁଥିବା ବେଳେ ଚଳିତ ବର୍ଷ ଏଥିରେ ହସ୍ତକ୍ଷେପ କରିଛି ପ୍ରଶାସନ । ବରୁଣେଶ୍ୱର ଉନ୍ନୟନ ପରିଷଦ ଏହାକୁ ଆୟୋଜନ କରିବାକୁ ପ୍ରଶାସନ ଜିଦ ଧରି ବସିଥିବା ବେଳେ ଏହାର ଦୃଢ଼ ବିରୋଧ କରିଛନ୍ତି ସ୍ଥାନୀୟ ବାସୀନ୍ଦା । ପୂର୍ବରୁ ଏହି ଉନ୍ନୟନ ପରିଷଦ ଓ ଅରେଇ ପଂଚାୟତ ମଧ୍ୟରେ ରହିଥିବା ବିବାଦ ହାଇକୋର୍ଟ ରେ ପହଂଚିଥିଲା ଓ ମହୋତ୍ସବ ଆୟୋଜନର ଦାୟିତ୍ୱ ଅରେଇ ପଂଚାୟତକୁ ଦେଇଥିଲେ ମାନ୍ୟବର ହାଇକୋର୍ଟ । ଏହି ବିବାଦ ଯୋଗୁଁ ମକର ସଂକ୍ରାନ୍ତି ଠାରୁ ଆରମ୍ଭ ହେବାକୁ ଥିବା ଏହି ମହୋତ୍ସବ ଚଳିତ ବର୍ଷ ହେବା ନେଇ ସନ୍ଦେହ ଦେଖାଦେଇଛି । ସେପଟେ ହାଇକୋର୍ଟ ଜିଲାପାଳ ଙ୍କୁ ମେଳା ଆୟୋଜନ ଦାୟିତ୍ୱ ଦେଇଛନ୍ତି ବୋଲି ଜିଲାପାଳ ସୂଚନା ଦେଇଛନ୍ତି ।ବିଂଝାରପୁର ବରୁଣେଶ୍ୱର ମହୋତ୍ସବ ଆୟୋଜନକୁ ଦେଖାଦେଇଛି ବିବାଦ । ଆୟୋଜକ ହେବାକୁ ଅରେଇ ପଂଚାୟତ ଓ ବରୁଣେଶ୍ୱର ଉନ୍ନୟନ ପରିଷଦ ପକ୍ଷରୁ ଟଣାଓଟରା । ଗତ ୧୯୫୯ ମସିହାରୁ ଏହି ମହୋତ୍ସବର ଆୟୋଜନ କରିଆସୁଛି ଅରେଇ ପଂଚାୟତ । ପଂଚାୟତର ସରପଂଚ ଏହାର ଦାୟିତ୍ୱ ନେଇଥାନ୍ତି । କିନ୍ତୁ ଚଳିତ ବର୍ଷ ଏହି ମହୋତ୍ସବକୁ ଆୟୋଜନ କରିବା ପାଇଁ ବରୁଣେଶ୍ୱର ଉନ୍ନୟନ ପରିଷଦ ଜିଦ ଧରିଥିବା ଅଭିଯୋଗ ହୋଇଛି । ପୂର୍ବରୁ ଏହି ମାମଲା ହାଇକୋର୍ଟ ପର୍ଯ୍ୟନ୍ତ ଯାଇଥିଲା । ଗତବର୍ଷ ଏହି ମାମଲାର ଶୁଣାଣୀ କରି ମାନ୍ୟବର ହାଇକୋର୍ଟ ଅରେଇ ପଂଚାୟତକୁ ଏହି ମହୋତ୍ସବ ଆୟୋଜନ ପାଇଁ ନିର୍ଦ୍ଦେଶ ଦେଇଥିଲେ । ଏପରିକି ସେତେବେଳେ ଉନ୍ନୟନ ପରିଷଦ ପକ୍ଷରୁ ଆଦାୟ କରାଯାଇଥିବା ରୟାଲିଟିକୁ ପଂଚାୟତର ଉନ୍ନୟନ ମୂଳକ କାର୍ଯ୍ୟରେ ଲଗାଇବାକୁ ମଧ୍ୟ ନିର୍ଦ୍ଧେଶ ଦେଇଥିଲେ ।
ପବିତ୍ର ମକର ସଂକ୍ରାନ୍ତି ଠାରୁ ବାବା ବରୁଣେଶ୍ୱରଙ୍କ ପୀଠରେ ଆୟୋଜିତ ହୁଏ ଏହି ପ୍ରସିଦ୍ଧ ବରୁଣେଶ୍ୱର ମହୋତ୍ସବ । ଯେଉଁଥିରେ ଲକ୍ଷାଧିକ ଲୋକଙ୍କ ସମାଗମ ହୁଏ । ଏକାଧିକ ଯାତ୍ରାପାର୍ଟି ଠାରୁ ଆରମ୍ଭ କରି ପଲ୍ଲିଶ୍ରୀ ମେଳା ଓ ମିନାବଜାର ପଡିଥାଏ । ବିଭିନ୍ନ ଦିନରେ ଆୟୋଜିତ ହୁଏ ସାଂସ୍କୃତିକ କାର୍ଯ୍ୟକ୍ରମ ଓ ଆଲୋଚନା ଚକ୍ର । କିନ୍ତୁ ଚଳିତ ବର୍ଷ ଏହି ମହୋତ୍ସବ ଆୟୋଜନକୁ ନେଇ ଦେଖାଦେଇଥିବା ବିବାଦ ଯୋଗୁଁ ସ୍ଥାନୀୟ ଅଂଚଳରେ ଚାପା ଉତେଜନା ପ୍ରକାଶ ପାଇଛି । ଜିଲାପ୍ରଶାସନ ତୁରନ୍ତ ଏଥିରେ ହସ୍ତକ୍ଷେପ କରି ପଂଚାୟତକୁ ମହୋତ୍ସବ ଆୟୋଜନ ନେଇ ଅନୁମତି ନ ଦେଲେ ଆନ୍ଦୋଳନକୁ ଓହ୍ଲାଇବାକୁ ସ୍ଥାନୀୟ ଗ୍ରାମବାସୀ ବାଧ୍ୟ ହେବେ ବୋଲି ଚେତାବନି ଦିଆଯାଇଛି । ସେପଟେ ଚଳିତ ବର୍ଷ ଏହି ମେଳା ଆୟୋଜନ ପାଇଁ ଜିଲାପାଳଙ୍କୁ ମାନ୍ୟବର ହାଇକୋର୍ଟ ନିର୍ଦ୍ଧେଶ ଦେଇଛନ୍ତି ବୋଲି ଜିଲାପାଳ ସୂଚନା ଦେଇଛନ୍ତି ।
