ଯାଜପୁର :(ଆନନ୍ଦ ଚନ୍ଦ୍ର ସାହୁ) ମହିଳା ଦିବସରେ ଯାଜପୁର ଜିଲ୍ଲାରେ ପୁଣି ଲଜ୍ଜା । ଗୁରୁ-ଶିଷ୍ୟଙ୍କ ମଧ୍ୟରେ ଥିବା ପବିତ୍ର ସମ୍ପର୍କରେ ଲାଗିଛି କଳଙ୍କ। ଷଷ୍ଠ ଶ୍ରେଣୀରେ ପଢ଼ୁଥିବା ଦୁଇ ଜଣ ଛାତ୍ରୀଙ୍କୁ ଜଣେ ଶିକ୍ଷକ ବାରମ୍ବାର ଦୁଷ୍କର୍ମ କରିଥିବା ଭଳି ସାଂଘାତିକ ଅଭିଯୋଗ ହୋଇଛି।
ଯାଜପୁର ପାଣିକୋଇଲି ଥାନା ର ଏକ ନୋଡାଲ ପ୍ରାଥମିକ ବିଦ୍ୟାଳୟର ଶିକ୍ଷକ ମୋହନ ଭୂୟାଁ ସ୍କୁଲ ପରିସରରେ ଦୀର୍ଘ ଦିନରୁ ଟିଉସନ କରି ଆସୁଛନ୍ତି। ପୀଡ଼ିତାଙ୍କ ବୟାନ ଅନୁସାରେ ଅନ୍ୟ ପିଲାମାନେ ପଳାଇବା ପରେ ଶିକ୍ଷକ ଶ୍ରୀ ଭୂୟାଁ ଲାଇଟ ଲିଭାଇ କବାଟ ଦେଇ ଶାରୀରିକ ସଂପର୍କ ରଖି ଆସୁଥିଲେ। ଘଟଣା କାହାକୁ ଜଣାଇଲେ ଜୀବନରୁ ମାରି ଦେବା ସହ ପରିବାର ଲୋକଙ୍କୁ ରାସ୍ତାରୁ ହଟାଇଦେବାକୁ ବାରମ୍ବାର ଧମକ ଦେଇ ଆସୁଥିଲେ। ଗତକାଲି ଛାତ୍ରୀ ଜଣକ ଶିକ୍ଷକଙ୍କ ନିର୍ୟାତନାରେ ଅତିଷ୍ଠ ହୋଇ ଆଉ ପାଠ ପଢ଼ିବ ନାହିଁ ବୋଲି ମା’ଙ୍କୁ କହିଥିଲେ।
ଏହାପରେ ଘଟଣା ଜଣାପଡ଼ିଥିଲା। ପରେ ପିଡିତା କୁ ଆଣି ଯାଜପୁର ମେଡିକାଲ ସ୍ଥିତ ସଖୀ କେନ୍ଦ୍ରରେ ରଖାଯିବା ପରେ ପୋଲିସକୁ ଖବର ଦିଆଯାଇଥିଲା । ଏହାପରେ ପାଣିକୋଇଲି ଥାନାରେ ପୃଥକ ପୃଥକ ଦୁଇଟି ମାମଲା ରୁଜୁ କରାଯାଇଛି। ଦୁଇଟି ମାମଲା ରୁଜୁ ହୋଇଥିବା ବେଳେ ଅଭିଯୁକ୍ତ ଶିକ୍ଷକ ମୋହନ ଭୂୟାଁଙ୍କୁ ପୁଲିସ ଗିରଫ କରିଛି।
